Mr. Barangay

Ako nang napaabot ngadto ni Mandaue City Mayor Jonas Cortes ug City Administrator Atty. James Abadia ang problema sa mga molupyo sa brgy Looc, Alang-Alang ug Cambaro nga mao ang pagtangtang sa no loading ug unloading sa Plaridel Street sa kadagkuan sa TEAM Mandaue nga gipangulohan ni Edwin Ermac. Sukad niadtong Nobiyembre problema ang mga tawo sa tulo ka barangay kay giwagtang ni Ermac ang jeepney stop sa Plaridel street gikan sa eskina Looc hangtod na sa eskina Opao nga maoy nakahatag kahasol sa kadaghanan. Maoy rason nga personal nakong gipadangat ngadto sa mayor ang problema nga gikakurat kaayo ni City Administrator Atty. Abadia nga diha atol sa among panag-estorya sa mayor. Matud ni Atty. Abadia nga way pagtugot niya ug sa mayor ang pagtangtang sa PUJ stop diha sa Plaridel Street nga gipatuman ni Ermac. Tungod niini gipasalig sa City Administrator pinaagi sa kamanduan ni Mayor Jonas nga atimanon ang problema ug kinahanglan gyod nga mabutangan og jeepney stop sa lugar. Salamat kaayo kun mapadali ang pagsulbad sa problema kay gawas sa mga molupyo sa tulo ka barangay daghan sab ang mga pasahero padung sa Lapu-Lapu ug sa Northern Cebu nga mag-atang diha sa lugar.

Dunay gipamalihog nako si Dr. Vivian Ceniza ang focal person namo sa PTA federation sa DEPED Mandaue City Division bahin sa kalihukan sa ilang barangay sa Upper Tingub nga magsaulog sa ilang kapistahan karung semanaha niadtong January 5 gihimo ang Yoyoy and Mac sing-a-like contest, kagahapon mao ang bulilit singing contest, karong gabii mao ang group dance contest, ugma sab mao ang search for a singing star hangtod na sa January 11 nga himuon ang ilang P.E festival. Gidapit ni Dr.Ceniza ang kadaghanan sa pagsaksi sa ilang mga kalihukan kay sigurado gyod mong malingaw niini.

BRGY LIBAS, MERIDA, LEYTE

“Sa mga ginagmay nga hinabang dili mi kadawat kay pilion ra ang tagaan kadto hinuong hatagan mao ang wala kaayo ma-damage ang mga balay basta kaliwat sa mga tagdumala sa relief goods, tabangi ming mahunong ning ilang gihimo.”

BRGY CALUMBOYAN, SOGOD, CEBU

“Sir Jun naghitak na sad diri ang shabu buyayha kaayo kung mag pot session duol ra sa among balay kuyawan mi kay kung badlungon ako maoy ilang rumbohon, mga polis diri way gihimo hasta ang mga opisyal sa barangay.”

BRGY OBOOB, BANTAYAN, CEBU

“Reklamo lang namo ning pagpanghatag diri sa Red Cross kay wala gyud mi kadawat nga unta guba man kaayo among balay pero ubang wala magub-i nakadawat man hinuon.”

BRGY CANDULAWAN, TALISAY CITY

“Sa zone 4 way agas-agas ang among tubig diri palihog mi’g paabot sa MCWD nga ayuhon ilang linya sa tubig aron dili nami mapurhisyo diri kay dugay na kaayo ni namong problema.”

Alang sa inyong mga reklamo text lang sa 09163869202 / 09071678643