Bag-ong paglaom

Kini ang hatud sa pagsud sa tuig 2014.  Lain-laing nasud, lain-laing paagi sa pagsugat sa bag-ong paglaum uban ang mga palihi nga ilang gihimo aron pagdani sa swerte.  Sa Thailand, nagpabuto sila og pusil ug kanyon pagbugaw sa mga dautang espiritu.  Sa China, naputos sa daghang fireworks ang kalangitan aron sa pagbugaw sa mga pwersa sa kangitngit.  Sa kasaysayan sa Amerika, naandan ‘sab kaniadto ang pagpabuto og mga pusil.  Ang mga Italyano nagpatingog sa ilang mga kampana, ang mga Swiss nigamit og mga tambol samtang ang mga taga North Americans nipatingog sa mga siren ug mga party horns.

Sa matag unang adlaw sa tuig, daghang mga paagi ang gihimo aron nga moabog sa malas  ug modani sa swerte.  Sa Denmark, mokaon sila og ring-shaped nga pagkaon sama sa donut nga nag-simbolo og ‘full circle’ aron sa pag-aghat sa swerte.  Sa Ireland, kompleto ang kasaulogan sa bag-ong tuig pinaagi sa pastries nga gitawag og ‘bannocks’.  Sa Espanya gikinahanglan nga mokaon og dose ka ubas sa tunga-tunga gabii dayong bag-ong tuig.  Sa India ug Pakistan—saad sa kaabunda sa kinabuhi ang hatud sa pagkaon og kan-on.  Sa Switzerland tradisyon na ang paghagbong og mga cream ug chocolate sa sawog aron sa pagdani sa swerte.

Apan ang bag-ong tuig sa sagad nga mga nasud sa kalibutan nagpasabot og pagpaambit og materyal nga gasa ngadto sa uban.  Sa Roma gipaagi sa paghatag og sinsilyo ang pagpaambit sa grasya sa bag-ong tuig.  Sa Persia magbayloay og itlog ang mga tawo didto.  Sa Egypt, maghatagay og mga karaang butang ang mga tawo didto.  Sa Scotland, magbayloay ‘sab og mga gamit sa kusina ang mga tawo.  Sa Scotland dako ang bili kun ikaw ang unang makahatag og pabor sa ubang tawo.   Dakong swerte ‘sab alang nila kung ikaw ang unang nahimong inahan o gikasal sa bag-ong tuig.

Apan aduna may tradisyon nga gisunod o wala, ang labing mahinungdanon naangkon nimo ang gasa sa bag-ong tuig nga nagpasabot og bag-ong kinabuhi ug paglaom.  Kini ang labing dakong mensahe sa pagsu’d sa bag-ong pahina sa kasaysayan.  Ug alang sa mga tawo nga nakasugat sa labing bug-at nga pagsuway ning tuiga, mas lawom  ang mensaheng hatud sa bag-ong tuig.  Alang sa mga biktima sa linog sa Bohol ug sa Sugbo nagpasabot ni og bag-ong panahon sa pagtimbakuwas gikan sa usa ka ngiob nga kagabhion.  Kung ilang nasugatan ang labing dakong pagsuway sama sa pagkagusbat sa ilang gipundar nga balay ug mga kabtangan, ang tuig 2014 nagpasabot og laing tinguha ug kahigayonan aron makaangkon sila sa hingpit sa kabag-ohan.

Pagbangon ang mensahe sa bag-ong tuig alang niadtong mga nabiktima ni bagyong Yolanda.  Sila nga nawad-an og mga balay, umahan ug labaw sa tanan sakop sa pamilya, karon mas mahatagan sila og rason aron nga mobangon ug mamunit sa mga nagkatag nga parte sa ilang kinabuhi.  Lisud man sabton unsaon nila sa pagbarug gikan sa usa ka makalilisang nga pagsuway, apan ang pagbukas sa tabil sa bag-ong tuig, nagpasabot og bag-ong paglaum nga ilang mahimong kahuptan.  

Daghan ang nag-ingon nga di’ na makabangon ang mga tawo nga gilampurnas ni bagyong Yolanda.  Apan daghan nila ang nagpakita na karon sa bag-ong tingusbawan pinaagi sa pagbarug human gipalukapa sa trahedya. 

Sa tabang sa gobyerno ug pribadong sektor, di’ imposibleng mahimo sa uban ang pagbangon human sa makapahugno nga bahin sa ilang kinabuhi.

Inspirasyon sa tanan ang pag-atubang sa mga biktima sa bagyo kanatong tanan nga sa kanunay moreklamo ug mopiyait sa mga pagsakit nga atong giatubang.  Human nato makit-i ang labing dakong kadaot nga gibilin sa mga trahedya ug mga pagsuway, makapangutana ‘ta kung aduna pa bay problema nga di’ maakos, aduna pa bay mga pagsuway nga di’ mapas-an ug aduna pa bay mga rason aron mawad-an ‘ta sa paglaom?

Email: [email protected] or [email protected]