EDITORIAL - Gitataw ang pagdaghan sa angol ugma

Nakalitan ang  mga  tinugyanan  sa  tambalanan sa Sugbo  gumikan  sa pagdaghan  sa  mga samdan  ug  naangol  sa pabuto  sa milabay  nga  Pasko.

Busa  ila  na  nga  giandam  ang  ilang  kaugalingon alang  sa pagsugat  sa Bag-ong  Tuig  uban  ang  mas daghan  pa nga  samaron  gumikan  sa pabuto.

Hinuon wa nila  paabota  nga  may  mabugtoan sa gininhawa  gumikan  lang  sa pabuto,  kay  pila  ra may kusog  sa naandang  firecracker  karon.

Ila  na nga  giandam  ang  mga  higdaanan, gibaid  na  ang  mga  gunting  aron  nga  di  matitanos  ang  panit  nga  gutlabon  niini.

Ang  mga  magkawil-kawil  nga  bukog  ug panit  maoy  kasagarang  putlon  pinaagi  sa gunting.

Kun  bukog  na  sa bitiis  o  kaha  bukton, gabas  nay  gamiton  sa  mga  doktor  aron matuali dayon  ang  putlonon.

May  mga  tambal  usab  silang  giandam, limpyo  ang  mga  habol ug unlan  ug  labaw  sa tanan  ang  mga  katre  sa  pasyente.

Sa laktud, gawas  nga  nangandam  sila  sa kalipay  pagsugat  sa Bag-ong  Tuig,  gipangandaman  nila  ang  makapakitbi  sa atay  nga  talan-awon sa dugo. Mga  lab-as  nga  dugo  gikan  sa mga  tudlo  nga magkawil-kawil, mabulhog, mabungi  ug  uban  pang  resulta   sa  masabak  sa pabuto.

Ang  peligrong   pabuto  sa Bag-ong Tuig  mao  ang    Yolanda nga  ang  mabuthan  niini, impas  gyud  ang  tanan.