Nahunahunaan sa kapolisan nga murag di masuta sa gobiyerno kun unsa na ka grabe ang epekto sa gidiling drugas sa mga Filipino karon.
Kini tungod kay gituman nila ang balaod nga matag tawo nga ilang madakpan gawas lang sa kaso nga bahin sa gidiling drugas, di nila testingan kun di ba tiggamita’g gidiling drugas ang ilang masikop.
Karon nga nakaamgo ang kapolisan nga nia na sa nasud ihandos ang gidiling drugas gikan sa mga nasud nga nagpasiugda niini sama sa China, Mexico, South America ug uban pa, gusto na nilang masayran kun unsa kabug-at kining maong kaso karon dinhi sa Pilipinas.
Gimando na sa kapolisan nga ipa-drug test ang matag tawo nga ilang madakpan aron masuta kun wa bay gidiling drugas nga naglatay sa kaugatan niini sa paghimo niya sa krimin.
Bisan unsang matanga sa krimin nga nahimo sa usa ka tawo, basta masikop siya sa polis, obligado na ang mga otoridad nga susihon ang iyang lawas og di ba gidiling drugas maoy nagtukmod kaniya sa maong krimin. Sa mao usab nga paagi, masuta sa kagamhanan kun unsa na ka grabi ang epekto sa gidiling drugas dinhi sa nasud karon.
Nagsugod kini niadtong 1980, daghan na kaayo ug di na maihap ang gipatay, gitulis, gilugos ug uban pang krimin nga mugna sa mga kamot sa drug addict, apan wa masuta sa kapolisan ang gidaghanon sa nabuang ning illegal drugs.