Palabra de honor
Taliwa sa kadaghan sa mga opisyal sa gobyerno nga way uwaw ug di kamao motuman og saad, duna pa gyud diay pipila nila nga mapili aron pagpahinumdom sa mga nawad-an na og paglaum nga di pa tanto nga “hopeless†ang sitwasyon sa atong gobiyerno.
Duna pa gihapoy mga opisyal nga dunay delicadeza ug kamao mohatag og gibug-aton sa iyang giluwatan nga mga pulong. Usa nila mao si Energy Secretary Jericho Petilla.
Si Petilla mipahibawo sa iyang plano nga mo-dimitir sa iyang pwesto isip energy secretary tungod sa wala niya matuman nga saad. Sa akong pagsuwat ning lindog, gikatakda siya nga mosubmitir sa iyang resignation letter ngadto sa Malakanyang.
Ang hukom niya nga moluwat sa katungdanan dili tungod kay siya gilambigit sa pasangil sa pagpangawkaw sa pundo sa gobyerno sama sa ubang mga opisyal nga hangtud karon nagpabaga sa ilang dagway ug nagpadayon paghupot sa ilang pwesto. Ang hukom ni Petilla tungod kay wala niya matuman ang iyang saad nga mabalik ang supply sa kuryente didto sa mga dapit nga naigo sa bagyong Yolanda sa dili pa ang Pasko.
Nahuman ang Pasko ug napakyas si Petilla pagtuman sa iyang saad, mao nga agi og kaikog iyang i-dimitir ang iyang pwesto. Kun buot huna-hunaon dili ni angayang buhaton ni Petilla tungod kay sayod ang tanan nga tungod sa kalapad sa kadaot sa bagyo dili gyud madali ang pagpabarog og balik sa mga natumba nga mga imprastraktura sa kuryente.
Apan salamat nga iyang gihatagan og gibug-aton ang pagtuman sa saad. Sa mga tawong dungganan ang pagtuman sa saad usa ka butang nga labaw pa kay sa bahandi.
Hinaut nga ang ehemplo nga gihatag ni Petilla mamahimong sumbanan sa uban pa nga mga kawani ug opisyal sa gobyerno.
* * *
Dul-an na sa duha ka buwan sukad miigo ang bagyong Yolanda. Sagad sa mga biktima hinay-hinay na nga nakabarog pagbalik uban sa mibaha nga hinabang dili lang gikan sa mga igsuon ta’ng pinoy kun dili lakip na sa mga silingan ta’ng kanasuran.
Klase-klase ang niabot nga mga hinabang, dunay pagkaon, tambal, mga gamit, ug bisan serbisyo sa mga mananambal gikan sa mga langyaw’ng nasud.
Usa sa mga nipaabot sa ilang tabang, bisan kun tuod dili maayo ang atong relasyon sa maong nasud, mao ang China. Lakip sa gihatag sa China mao ang daghan nga mga tents aron magamit isip temporaryong kapuy-an sa mga biktima sa bagyo nga nawad-an gyud sa ilang pinuy-anan. Apan naguol ko’ng nagsud-ong sa nagtipun-og nga mga tents gikan sa China nga hangtud karon wala pa maapud-apod sa Kapitolyo. Nagtipun-og lang nga nabuwad sa init ug mauwanan ang mga tents diha sa parking area sa Kapitolyo.
Hinaut nga sobra ni sa panginahanglan sa mga biktima sa bagyo tungod kay di ko kasabot nganong hangtud karon wala pa ni mapaabot sa mga nagkinahanglan. Kun sobra man gani ang maong mga tents, maayo tingali nga pasilongan sa Kapitolyo ang maong mga hinabang aron sa sunod nga higayon nga kini gikinahanglan mamahimo pa natong magamit ug kapahimuslan.
* * *
- Latest
