Giharos

Giharos gyud sa mga kaalyado sa Team Rama ang tanang pwesto sa Association of Barangay Councils dinhi sa dakbayan. Atol sa ilang piniliay niadtong miaging Miyerkules way bisan usa sa mga kandidato nga kaalyado sa Bando Osmeña Pundok Kauswagan kon BOPK ang milusot gikan sa presidente hangtud sa mga membro sa hunta direktiba.

Napili isip bag-ong pangulo sa ABC ug molingkod isip ex-officio member sa konseho sa dakbayan mao ang suod nga kaalyado ni Mayor Mike Rama ang iyang kanhi chief of staff nga karon kapitan sa Tisa nga si Philip Zafra.

Gilubong ni Zafra og taga-liog ang iyang kaatbang nga si Kapitan Manuel Guanzon sa Capitol Site. Si Zafra mihipos og 54 botos samtang si Guanzon duna lay 22 botos. Ang ubang mga mananaog mao sila si Tinago Barangay Captain Joel Garganera isip bise presidente, Jose Navarro sa Punta Princesa isip auditor. Samtang ang mga board of directors mao sila si Ramil Ayuman sa Apas; Elvis Narra sa Alaon; Wilson Bacor sa Binaliw; Althea Lim sa Poblacion Pardo; Lotlot Ignacio-Soon sa Inayawan, Noli Alcover sa Agsungot; Boy Miranda sa San Roque; Dante Tabucal sa Sudlon I; Dodong Cagang sa Basak Pardo; ug Francis Espares sa Quiot.

Ang resulta sa ABC elections nagpakita sa dako na nga pagkibra sa impluwensiya sa giilang lider sa BOPK nga si Tomas Osmeña ngadto sa mga kapitan. Samtang tinuod mayoriya sa mga nidaog nga kapitan sa miaging barangay elections kaalyado sa Team Rama apan wala ko magdahom nga ingon niadto ang mamahimong resulta.

Kini tungod kay sigun sa kwentada sa BOPK alkansi lang sila og mga duha ka kapitan. Kun basihan ang resulta sa ABC elections tataw nga dunay mga kapitan nga kaalyado sa BOPK nga nagbudhi.  Hinuon normal ni sa politika. Apan basin nakalimot ang maong mga kapitan nga samtang wa nay katungdanan si Osmeña apan kontrolado gihapon sa iyang mga kaalyado ang konseho.

Gawas niini kaalyado pa gihapon sa BOPK ang duha ka mga kongresista sa dakbayan, sila si Kongresista Raul del Mar sa North District ug Bebot Abellanosa sa South District.

Bisan hinuon madugangan ang kaalyado sa Team Rama sa konseho pinaagi ni Zafra apan magpabiling mayoriya ang BOPK. Buot ipasabot niini nga limitado gihapon ang lihok sa mayor tungod kay mamahimo siyang babagan sa konseho.

* * *

Human sa ABC elections daghan ang miingon nga himatyon na ang political career ni Osmeña ug nga posibling di na gyud siya kabalik sa pwesto hangtud mahuman ni Rama ang tulo niya ka termino. Mamahimong dunay sukaranan ang maong obserbasyon, apan dili pa hingpit ikasalindot ang posibling pagtuyhakaw pagbalik sa iyang political career tungod kay nag-ong-ong pa hangtud ron ang iyang protesta.

Ang bugtong paagi nga makuha pagbalik ni Osmeña ang liderato sa dakbayan mao ang pagsiguro sa iyang kadaugan sa iyang protesta. Sa higayon nga mapakyas siya niini, maglisod na siya sa pagpakigsakbang ni Rama sa 2016. Kini tungod kay mayoriya sa mga kapitan tua na ni Rama.

* * *

[email protected]