Asa na ang extraordinary diligence

Ang balaud nagsita sa mga pangpublikong sakyanan sa pag- obserbar sa pinakataas nga diligence sa pagpadagan sa ilang mga sakyanan tungod sa rason nga kinabuhi sa mga pasahero ang ilang gidala. Apan sa milabay nga pipila ka adlaw daw nabaliwala ang maong balaud tungod sa sunod-sunod nga mga disgrasya sa kadalanan nga naglambigit sa mga bus de pasaheroan.

Didto sa kaulohan 18 ka mga pasahero ang namatay ug daghan pa ang naangol tungod sa pagkatagak sa Don Mariano Bus sa Skyway. Samtang dinhi sa Sugbo patay ang inahan ug anak ug daghan usab ang naangol tungod sa pagtakilid sa Ceres Bus sa lungsod sa Badian. Ang maong disgrasya bag-o lamang sa daghan nang disgrasya sa kadalanan sa mga nanglabay nang katuigan.

Sa daghang disgrasya sa mga sakyanang de pasaheroan kasagaran nga gitumbok nga hinungdan mao ang human error o sayop sa nagmaniho sa sakyanan. Sigun sa balita nakatulog ang driver tungod sa kakapoy sa pagmaniho nga wala’y tulog-tulog ang hinungdan sa pagkatagak sa iyang gimanihong sakyanan sa skyway.

Sigun sa liquor test, nakainom ang driver sa Ceres Bus nga mitakilid sa lungsod sa Badian. Gawas nga nakainom, giingon usab nga naglalis ang driver ug ang iyang asawa nga diha sa iyang tupad kuyog sa ilang bugtong anak samtang nagmaniho siya sa sakyanan.

Angayang balikan sa mga driver ang ilang mga responsibilidad sa pagmaniho aron malikay sa disgrasya ang ilang mga pasahero. Ang mga driver kinahanglang pahinumdoman nga sa ilang pagpadagan sa mga sakyanang pangpubliko gisita kanila sa balaud ang pinakataas nga pag-amping tungod kay ang kinabuhi sa ilang mga pasahero anaa kanadepende kanila.

Ako usab nga isugyot ngadto sa mga driver ang dili pagdala sa ilang asawa o anak sa ilang pagmaniho samtang namasahero aron malikay sila sa peligro o disgrasya kay kun magkinaunsa atleast aduna pay mahabilin sa iyang pamilya kun ugaling siya madisgrasya.