EDITORYAL - Ang dinaghan nga sunog sa kabalayan

Kun di  pa lang  sikit-sikit  ang kabalayan  sa  mga pinuy-anan  sa mga  kabus  ning  dakbayan, di man  tingale  unta  daghan  ang  masunog  sa usa  ka  higayon.

Hinuon  bisan  unsaon  og  basul  ang  nagpasiugda  sa  sunog,  nahuman  na  ang  tanan  nga  matag tag-iya  sa bay  nga  naugdaw  igo  nalang  sa pagpanighupaw.

Ang  kayo  dali ra  kaayong  mosunog  kutob  sa maagian  niini  nga  madutlan  sa  iyang  siga.

Busa  bisan  imo  rang  silingan  ang  masunog, natural  nga  kundi  mapawong  dayon  ang  maong  kayo,  ang  imo  gyu’y  isunod  niini  kay  naa  ka  man  sa duol.

Hinungdan  nga  giplano  sa  mayor  nga  una  tarokan  og  bay  ang  nasunogan, kinahanglang  buhatan  una  kini  og  plano.

Sa maong  plano  giplastar  na  ang  mga  dalan  o  agianan  sa tawo  ug  sakyanan.

Busa  sigurado  nga  may  maapektohan niini  nga  di  masukod  ug  di makapuyo  pagbalik  sa lugar  nga  nasunogan  ilabi  na  kun  ang  balay  niyang  nasunog  himoon  na  nga  karsada.

Ang  pag-abli  og  karsada  sa nasunogan,  gikinahanglan  kaayo  aron  kaagian  sa  mga  trak  sa bombero  kun  moulbo  pag-usab  ang  sunog  sa maong  lugar.

Hinuon  kun  maplano  lang  pag-ayo, di  tingale  mahitabo  nga  may molupyo nga  di  na makabalik  sa pagpapuyo  sa dapit  nga  nasunogan  bisan  kun may  reblocking  nga  ipatuman  ang  kagamhanan  sa  siyudad.