Ang kamatayon sa tawo gitakda na nga daan sa Dios apan wa lang hisayri sa mga hingtungdan kun unsang matanga sa kamatayon ang iyang masugatan.
Kun mamatay tungod sa matang sa imong trabaho, mahimong mao gyud kana ang tukmang sukdanan sa imong kinabuhi.
Hinungdan nga kun ang usa ka polis, abogado, doktor, engineer, radio announcer, mapusilan patay, daghan kaayong estorya o libak ang mahimong lamas sa palibot sa matang sa kamatayon niini.
Ang ‘media killing’ nahimo na nga pagya matag higayong may patyon nga sakop sa media.
Kun may mga tawo mang dali patyon sa bala ug kutsilyo gawas sa sundawo ug polis, way lain kundi ang taga media tungod kay ang sinultian niini sa radyo o kaha sa pamantalaan hait pa sa bala ug pinuti.
Ang bala ug pinuti gihimo aron sa pagpatay, apan ang microphone sa radyo ug pamantalaan gihimo aron pagmaymay, pagpasabot aron magbag-o ang tawong sad-an.
Busa kun gamiton sa taga media ang iyang trabaho nga sama sa pusil ug pinuti, nganong di siya manaug sa announcer's booth o kaha mobiya sa panuwat sa pamantalaan aron ihawon kadtong tawong gitan-aw niyang sad-an.
Ang tawong sad-an kun imo pang pakauwawan, wa nay panahon sa pagbag-o ug ang mosud sa utok niini mao ang paggamit og paagi nga patyon kadtong motiwas pagpakauwaw kaniya.
Ang labing maayong buhaton sa taga media, mokulata man pinaagi sa microphone o kaha sa pamantalaan buhaton nga may gugma aron magbag-o ang tawong sad-an.