Nakadawat ko og report nga adunay usa ka sakyanan sa kagamhanan nga kanunay’ng maghatud ug kuha sa usa ka tinun-an sa Toledo City Central School.
Ang akong informer wala makatug-an kun kinsa ang migamit sa sakyanan apan gihatag niya ang Plate Number nga mao ang SHW-985.
Dunay posibilidad nga ang migamit sa sakyanan dili mao ang giisyohan niini apan makapangutana kita kun ngano nga nagamit man.
Ang paggamit sa sakyanan sa kagamhanan sa paghatud-kuha og bata sa tunghaan usa ka pagpangabuso sa butang sa gobyierno.
Kun kinsa man ang giisyuhan sa maong sakyanan tan-awa ngano nga kini nahitabo man.
* * *
Dunay mireklamo nga wala gihapon masumpo ang sugal nga masiao kay nagpadayon man ang mga ushers sa pagpamaligya og kombinasyon sa numero, apil kining gitawag og swertres.
Diha sa Sitio Sudlon Lahug daghang mga tigbaligya og numero sa masiao. Kaniadto abtik kaayo ang Vice Squad manakop pero karon panagsa na lang ang kapolisan mangronda.
* * *
Grabe ‘sab kuno kaayo ang illegal nga sugal sa Barangay Cabangahan, Consolacion. Hantak ug tigbakay unya kada adlaw g’yud. Unsa may gihimo sa mga opisyal sa barangay? Unya, kamong mga polis sa Consolacion unsa may inyong gihimo?
Mao kana ang rason nga gikatahapan kamo nga nagdawatan og suborno sa mga tigpasiugda sa illegal nga sugal kay gipasagdan ra man ninyo.
* * *
Si Dencio Butal sa Barangay Ibo, Lapu-Lapu mireport kanako nga adunay nagpadayon nga illegal fishing diha sa kadagatan tunga-tunga sa Lapu-Lapu ug Consolacion.
Matud ni Dencio nga ang illegal nga pangisda mao kining gitawag og Little Trawl kon Liba-Liba nga gidili sa balaud kay makapuo man kini sa isda.
Dalaygon ang gihimo ni Dencio nga pagpakabana sa atong kadagatan ug angay’ng tagdon kini dayon sa kadagkoan sa Kapitolyo ingon man sa mga sakop sa Bantay Dagat sa Consolacion ingon man sa Lapu-Lapu.
* * *
Kinsa ba kining anak og konsehal diha sa Pulpogan, Consolacion nga giingong nalambigit sa pagpamaligya og gidili nga drugas?
Ang report nga miabot nako mao nga kining maong anak og konsehal giprotehean kini og polis.
Hala ka diha! Mao diay kuno nga gidakop kadtong drug pusher nga si “Bukog†kay kompetensya man diay sa anak sa konsehal. Sakpan ka gani mapriso ka g’yud.
Apil ‘sab nga gireklamo kining mga fastcraft nga moagi diha sa Mactan Channel, kanang dagat nga nag-uwang sa Lapu-Lapu ug Cebu mainland nga pwerteng kusoga mopadagan.
Ang mga tag-iya og gagmay’ng sakayan mihangyo nga hinay lang unta inig-agi diha kay sa miaging semana may sakayan tawon kuno nga nalunod tungod sa dagku nga bawod.