Pahimulos gyud

Kun nakabantay kamo, hilabihan nga nakapaburot sa presyo ang mga tindahan og mga nag-unang palaliton. Walay nahimo ang mga kunsomedor tungod kay ang gihimo nga rason mao ang duha ka trahedya nga nahitabo – ang linog niadtong Oktubre 15 ug ang bagyong Yolanda niadtong Nobiyembre 8.

Ang bugas humay karong panahona lapas na sa P35 ang presyo. Ang itlog sa Minglanilla public market tag-P5 na ang gagmay ug   aduna nay tag-P6. Ang rason: wala nay itlog gikan sa isla sa Bantayan, mao nga nakapatuyang og pamahal ang mga itlogan sa habagatang Sugbo.

Maayo lang og dili mosunod sa Meralco ang Visayan Electric Company (VECO) sa pagpasaka sa matag kilowatt hour sa atong gikunsomo nga kuryente, kay kun mahitabo kini, puwerte na gyud natong luoya kay pun-an pa sa nag-anam og saka sa presyo sa kuryente, bisan stable ra ang presyo sa world market.

Mao nga nakahunahuna ko sa pag-imbento niining pag-ampo, iyawat maluwas kita sa kalbaryo human sa kalamidad:

“O Ginoong Dios, kaloy-i ang imong lungsod. Luwasa gikan sa umaabot nga katalagman aron dili mahimong makaluluoy sa mga kamot sa mga mapahimuslanong negosyante nga mohatag og kalbaryo sa mga biktima sa kalamidad pinaagi sa pagpasaka dayon sa presyo, nga wala maghunahuna sa epekto ngadto sa makaluluoy nga sitwasyon sa imong katawhan. Kaloy-i kami. Amen”

Apan mag-unsa kining atong pag-ampo kun adunay mga mapahimuslanong grupo o indibidwal nga mag-ampo nga adunay manghitabong trahedya kay diha sila mabulahan?

Aduna kitay Department of Trade and Industry ug National Food Authority (NFA) apan hilabihan ka-inutil pagprotehir sa katungod sa mga kunsomedor. Mahimo na hinuon silang tigpamaba o abogado sa mga negosyante.

* * *

Ilubong na sa kalimot sa mga tinugyanan sa Bureau of Customs ang hapit 16,000 ka sakong bugas humay nga naabot dinhi sa Sugbo gikan sa MICP ug giingong ipanghatag sa mga biktima sa bagyo didto sa Isabel, Leyte.

Nanghinaot lamang ko nga tinud-on sa tag-iya niini ang kalumo sa iyang kasingkasing aron mapuslan sa mga biktima sa bagyo ang maong mga bugas, ug dili iliko paingon sa merkado.

Nanghangyo ko og taga-Isabel, Leyte sa pag-monitor kun aduna ba gyu’y usa ka barkong bugas nga naabot sa inyong lugar ug i-apod-apod ngadto sa mga biktima ni Yolanda.

Apan kun aduna kamo’y mga binuang nga mabangalan mugna nianang maong mga bugas, ayaw kamo pagpanuko og sumbong kanako agi sa among opisina o pinaagi sa telepono 0942-5569123 o 253-8613.