Sa Tacloban City, bukas kaayong gi-display sa mga tawo ang mga butang nga giingon nilang mga kinawat gikan sa usa ka dakong tindahan sa maong lugar human sa bagyo.
Nagkalain-lain ang maong mga baligya nga naglakip sa mga kape, posporo, katol ug uban pa.
Wa sila’y kukahadlok sa pagpamaligya sa maong mga butang kay wa man usa’y mga tag-iya nga nangita niini.
Apan ang mga imported nga mga baligya nga gi-display sa tindahan sa Makati maoy gitutokan karon sa mga kapolisan.
Giingong usa kuno ka General ang mibaligya niini ngadto sa usa ka dakong tindahan sa Makati uban gihapon ang mga marka niini nga gikan sa US.
Ang maong mga baligya giingong mga relief aid para sa mga biktima sa bagyong Yolanda.
Hinuon kun kining mga butanga iglalabay sa America o para kanila usa lang ka matang sa basura, wa man tingali problema.
Apan kun gigastohan kini nila og salapi aron maoy ikahinabang sa mga Filipino nga nabiktima sa katalagman, kaanugon baya. Imbis mahiadto sa mga kabus nga biktima, tua na man hinuon sa lugar nga di maoy angay hatagan niini.
Mokatawa lang hinuon tingali ang America niini ilabi na nga nasayod sila sa mentalidad sa mga Filipino nga di kapiyalan sa mga butang nga di ilaha.