Ang pagkamatinabangon

Daygon nako si Konsehal Margarita “Margot”Osmeña nga miatiman g’yud sa mga bakwit nga taga Tacloban  ug anaa karon sa Guadalupe Sports Complex.

Nindot ang gihimo ni Konsehal Margot nga wala mahimo sa ubang mga opisyal. Gihatagan niya sa ilang panginahanglanon ang mga bakwit.

Nakasabot ko ngano nga iya kining gihimo. Anaa magpuyo si Margot sa Guadalupe  ug giisip niya nga iyang mga bisita ang mga bakwit nga anaa gibutang sa sports complex.

Ang DSWD maoy mihatag og pagkaon sa mga bakwit mao nga si Margot mihatag usab sa ubang kinahanglanon, ilabi na sa kababayen-an.      

Miabag usab kaniya ang grupo sa kababayen-an nga iyang mga suod. Tungod niini, mapasalamaton kaayo ang mga bakwit kang Konsehal Osmeña.

Saludo ko nimo Ma’am Margot!

*  *  *

Karon pa ako nga dili diay maayo puy-an ang bukid kun daghan sa imong mga silingan ang dili maghuna-huna.  

Una, pwerteng daghana nga anay nga mokaon sa mga kahoy nga dapat sa imong balay. Kahilakon ko nga nagtan-aw sa nagkahuyang nako nga balay kay gianay diay.

Ikaduha nga rason nga bati puy-an ang bukid mao nga daghan sa mga tawo ang kuwang og panabot sa epekto sa ilang mga gipanghimo – ang pagdaub bisan buntag pa.

Inigmata nato, mohanggap g’yud unta kita og presko nga hangin apan diri sa among dapit unahan sa Marco Polo Hotel daghang tawo ang walay panghuna-huna nga dili tukma ang pagdaub og mga sagbot sa sayo nga buntag.

Karon lang, pagsuwat nako niining lindog, mipusnga tawon ko sa grabe’ng asu kay may nagdaub diay unahan sa akong gipuy-an.

Duna ‘say uban nga maghaling og kayo sa pagluto nila’g pagkaon unya ang gamiton mga guma, daan nga sinelas nga makamugna og makahilo nga asu.

Matag higayon nga adunay magdaub sa ubos nga bahin sa bukid, ang asu mouban sa hangin ug mahanggap tawon namo nga dia sa ibabaw ang kabalayan. Ambot kanus-a pa kaha intawon makasabot kining maong mga tawo sa epekto sa ilang gihimo.

Dili man hinoon nato mapugngan sa paghaling og kayo kadtong dili gayud makaabot pagpalit og mga LPG, apan ang ila nga gihimo nga paggamit og mga dangilag nga guma ug mga plastik, binuang na ‘sab.

Kun may kwarta pa lagi, kanindot ibalhin dayon sa laing lugar. Apan ang kapobre maoy nagbuot nga pabilin lang tawon ko sa pagbagutbot hangtud nga makahuna-huna kining mga tawo nga sayop ang ilang gihimo.

Ambot og kanus-a pa kaha nga kining maong mga tawo mogamit sa ilang utok sa paghuna-huna alang sa tinarung nga dili sila makasakripisyo sa uban.

Mingaw ang Pasko?

Ni ALC with JVJ

Daghan tang nadunggang  mga tawo, uban nila atong mga higala, nga miingon: “Mingaw ning Paskoha oi.”

Mingaw kuno tungod kay way kuwarta. Mingaw alang sa pipila tungod kay way bonus. Mingaw sad sa uban kay nahurot na og pamirenda ang alahas ug way sapi nga ikalukat.

* * *

Nagka-istoryahanay mi kagahapon lang sa akong kauban sa women’s club nga si Esther (tinuod niyang ngalan apan gipugngan ang apelyido) ug matud niya:

“Malas unta ning Paskoha alang kanamo kay natangtang sa trabaho akong bana ug naimbargo ang gidata-datahan namong tv set, pero OK lang. Angay’ng ikalipay gihapon ang Pasko kay buhi pa man ta ... Nagsugod na man gani mi sa among matag adlaw Thanksgiving Prayer ngadto ni Lord.”

* * *

Ingon nianang attitude sa akong amiga ang maayong sundon unta sa katawhan ning umaabot nga Pasko. Bisan unsang problema sa kinabuhi angay tang malipay panahon sa kapaskohan. Kini suma ni Fr. Ernie Gopez, ang Sugbuanong pari nga pangu sa pundok “mga Sundalong Bisaya ni Kristo” didto sa Manila.

* * *

Mura bitaw ko lainan maminaw sa mga tawo nga moingon “Mingaw ning Paskoha kay way kuwarta.”

Kuwarta tuod makalipay unta sa Pasko apan kun way kuwarta kalimtan na lang ang kinabuhi nga maoy adlaw-adlaw nga gasa kanato sa Ginoo bisan dili panahon sa Pasko.

* * *

SA LAING BAHIN ... Maayong buntag sa atong mga suking magbabasa sa mga dan D. Jakosalem, Sikatuna, F. Ramos, ug mga kasilinganang dapit. Daghang salamat sa inyong suporta sa Banat News.