Relief operations sa Madridejos

Dili lalim kining mabiktima sa bagyo. Gawas sa akong kasinatian sa bagyong Ruping niadtong 1990, gikumot akong dughan nga nagtan-aw sa mga biktima didto sa barangay Bunakan, Madridejos, ilabi na sa mga bata nga nawad-an og mga lawak-saringan kay gipahapla ni Yolanda.

Among grupo sa Immaculate Heart of Mary Shrine sa Minglanilla pinanguluhan ni Fr. Jojo Deligero, uban ni Rotary Club of Cebu Minglanilla immediate past president Lumen Cañedo, Dr. Roche Veloso, kanhi Kapitan Tess Villamor sa Tungkop, konsehal Ynes Burbos sa Vito ug mga sakop sa Minglanilla Youth Organization, miduaw sa Bunakan, Madridejos diin nagbarog ang usa ka parokya nga walay simbahan ug konbento nga gidumala ni Fr. Weny Cuevas.

Dili mapugngan ang pagtulo sa luha nga magtan-aw sa mga bata nga gipaduwa sa mga parlor games nga giandam nilang Kim Bautista ug Ms. Jennifer Alidon, magtutudlo sa Minglanilla Central School.

Ang ilang mga pahiyom samtang nagkaon sa gipangdalit kanila dili matukib, apan dala ang ilang kahingawa kun asa sila magklase human mapayhag ang ilang mga lawak-saringan ug pangabasa sa ilang mga notebook ug libro. Ang relief operations nga nangabot pinaagi sa paninguha ni Fr. Cuevas ug ni Fr. Jojo walay pili, lakip na ang mga sakop sa ubang tinuohan na-aporan sa mga bugas, de lata, tubig, sin ug lansang para sa ilang mga atop, tsinelas ug mga sapot.

Sa pagpaingon pa lang namo sa Bunakan gikan sa pantalan sa Sta. Fe, among nasaksihan ang mga balay nga nangabungkag ilabi na ang ilang mga atop, mga lubi nga nangabali ug nangahapay ang mga lukay ug bunga.

Ang makaluluoy’ng sitwasyon mao ang mga manokan (layers) alang sa itlog. Ang bagyong Yolanda miguba sa labing dakong egg industry nga anaa magyaka sa isla sa Bantayan. Ang mga manok anaa na lang ilawom sa tangkal nanuktok sa ilang tuktokon samtang ang mga nipa nga mga atop nangyaka hawok sa yuta. Human sa bagyo, gipamaligya na lang ang mga manok (cull) og tag-P50 ang ulo.

Bisan sa kawalay tulog (kay kinahanglang mogikan og alas 12 sa tungang gabii aron makasakay sa barge paingon sa Sta. Fe sa alas 4:30 sa kaadlawon), nabayran bisan ang among kakapoy sa mga ngisi ug timbaya sa mga biktima sa bagyo nga nakadawat sa gamay’ng hinabang.

Dili na lang ko mangandoy nga makaadto sa Tacloban, Palo o sa Ormoc. Kay dinhi sa atong tugkaran adunay nag-antos human  maigo sa maong makalilisang nga kalamidad.

Kun nagyawyaw ang mga tawo nga didto sa Tacloban ug ubang parte sa Leyte wala dayon mogimok ang kagamhanang nasyonal ug sa ilang pagtungha hinay pa gyud kaayo ang ilang mga response ug rehab operations, samot na sa mga lugar sa amihanang Sugbo diin wala gyu’y makit-an taga-gobyerno nga nag-atiman sa mga tawong gihampak ni Yolanda.