Panahon na karon nga seryosohon sa katawhan ang panawagan su’d sa dugay nang katuigan may labot sa pag-atiman sa kalikopan.
Duha ka semana na ang nakalabay dihang gikunis-kunis ang Central Philippines sa super typhoon Yolanda nga gikonsiderar sa mga eksperto nga kinakusgang bagyo nga aktwal nga mitugdon sa yuta.
Mikalas kini og kapin sa singko mil ka tawo ug dul-an P300 bilyones ang damage nga gibilin niini sa atong nasud karon.
Ang mga batid sa siyensya miingon nga epekto kini sa Climate Change, hasta na ang mga nangaging mga talagsaon kakusog nga mga bagyo ug grabeng pag-ulan nga gitawag og La Niña ug ang grabeng huwaw o El Niño nga grabe usab kainit sa panahon.
Ang Climate Change nakaapekto na sa level sa dagat tungod sa pagkahilis na sa mga ice didto sa North ug South Poles bunga sa pag-init na sa temperatura sa kalibotan.
Matud pa nga ang polusyon maoy nag-unang hinungdan sa pag-init sa temperatura nato, mao usab kini ang hinungdan sa pagkabuslot sa atong Ozone Layer ug ang pagsulbong sa mga dili ordinaryong mga katalagman sama sa mga sakit.
Ang Pilipinas nabutang sa frontline sa Asya-Pasipiko nga mao’y agianan sa mga bagyo una pa kini motugpa padung sa mga South East Asian Nations ug China.
Ang Climate Change dili lang responsibilidad sa gobiyerno, mga pabrika, ug bisan sa United Nations. Responsibilidad nato kining tanan, kay ang katalagman wa’y gipili kinsa hugpaan.