Ang pagkahari uban ang krus niini

Ang tumong kun nganong gipasiugdahan ni Papa Pio Onse ang Solemnidad ni Cristong Hari mao ang pagtubag batok sa mga atiyesta sa iyang kapanahonan ngawala motuo sa Dios ni sa Simbahan. Kini tungod kay sa mata sa usa ka atiyesta ang Dios ug Simbahan wala kinahanglana sa adlaw-adlaw nga pagkinabuhi. Bisan gani si Karl Marx ang nagtuo man nga ang relihiyon opium alang sa katawhan. Kini tungod kay ang pagkahari ni Jesu-Cristo lahi ra kaayo kun itandi sa pagkahari sa panan-aw nga kalibutanon. Kini kay kuyog sa pagkahari ni Cristo mao man ang krus diin siya gilansang ug gibiay-biay. Ang maong kahimtang resultado sa iyang gisubay nga kinabuhi. Apan luyo ning maong kahimtang iyang gipakita nga ang pagkahari kinabuhi ug tawag sa pangalagad.

Sa atong mga nasinating katalagman daghan kanato ang nihimo og mga depensa batok sa buhing kamatuoran nga kulang kita sa sistema kun unsaon pagpadagan ang tanan. Tinuod manggihatagon ang tanang mga Pilipino. Nagbaha ang mga hinabang apan haguka ang pamaagi sa pagpatuman niini, ang liderato sa apektadong mga dapit ang nag-iyahay na lamang sa paghiklin biniyaan ang katawhan nga kanila gisangon. Niangkon sila nga sila kabahin pud sa mga bagang duot sa mga biktima ug angayan lamang nga ilang himuon ang pagpanalipod sa ilang kaugalingon. Apan kun atong paladman, atong makita nga ang maong gibuhat pagpakita lamang nga wala silay mahimo o kun duna man gani, kutas ra kaayo ang pagsakripisyo.

Daghan pa man tuod ang katalagman mosugot kita ug sa dili, ang mahinungdanon natong himuon karon mga panahona mao:

1. Sentido komon.

2. Paghan-ay sa buhatunon sa hustong dapit aron dili kita maglibog.

3. Pagpaminaw ginamit ang atong pagbati uban ang pag-ampo ug pamalandong. Dili kini silot sa Dios kabahin lang kini sa natural nga kadaut.

Gitawag ko nila kay mag-repack na sa mga relief goods. Apan ako gibati og katingala kun duna bay kasal kay gihatag man sa buotang donor ang usa ka traje de boda...ambot asa kaha ang veil ug chord nga pakapin niini.