Singapore Red Cross

Naatlan ko sa parking space sa usa ka hotel ning dakbayan, nga nagkarga og mga bag sa Red Cross, presumably puno sa tambal sulod sa duha ka van. Pagkaudtaud, nanaug walo ka mga batan-ong lalake ug babaye, laing duha ka hamtong, sakay sa van, uban sa mga tambal.

Nakahigayon kog pangutana sa usa ka hamtong. Padulong sila sa Ormoc, kay lisud konong dunggoan ang Tacloban. Mao pay ilang pag-abot niadtong buntaga (Nov. 20) gikan sa Singapore, mi-check in kadiyot, dayog larga paingon sa Leyte.

Ang Singapore usa lamang sa mga nasud nga mitunol og tabang sa mga biktima ni Yolanda, tapus nila makita unsa ka daku sa kadaut nga gibilin sa labing bangis nga bagyo nga mihagsa sa atong nasud nga nagdala sa makalilisang nga storm surge kon kining pagsuyla sa mga dagkung balud paingon sa mamaa.

Daku ang atong pasalamat nga wala kita pasagdi sa atong kaigsuonan sa ubang kanasuran, despite sa mga panghitabo sa looting kon pagpangawat sa dakbayan sa Tacloban nga naghatag og dautang image sa atong nasud.

Dili masabot nga taliwaa sa daghang nangamatay, daghang nangaangol, nahapay ang kabalayan ug mga dagkung building, adunay mga tawo nga magpahimulos sa higayon nga naghatag og dugang kadaut sa nagusbat na nga dakbayan.

Gumikan sa kagutom? Ngano man diay, mabusog ba sila sa mga appliances ug mga karsones nga ilang gipangawat? Matud pa, dili na kadto looting … stealing na gyud to. Lakip ang bodega sa NFA ilang gi-ransack. Pastilan!

Lisud i-justify ang ilang linuog nga buhat, bisag gi-justify kini sa Department of Justice. Unya, makadungog kita’g mga istorya nga ang mga relief goods gikan sa gawas, gipangilisdan kuno’g local nga mga items. Pastilan … kinsa man ni sila? Nganong gipasagdan man lang ni sa gobyerno? Sa man, taga-gobyerno ra poy nagbuhat ini?

Di uroy sila mahadlok og gaba no? Waa kaha sila karon sakiti sa ilang mga tiyan pagkaon nga ilang kinawat? Giunsa man nila pag-eksplikar ug pagpasabut ang ilang mga anak nga all of a sudden na-imported na man ang ilang mga pagkaon?

I hope dili kini tinuod. Or perhaps, nagpakabuta-bungol lang ang atong gobyerno. Ug lagmit ila pa kining gi-justify nga kuno wala maanad ang mga biktima pagkaon sa mga imported nga mga linata. Pastilan, Pinoy!

Anyway, pila lang ni sila ka badlungon nga Pinoy. Apan, akong ma-imagine nga inig-uli sa mga langyaw ngadto sa ilang nasud, manugilon sila sa nahitabo dinhi sa atong nasud … bahin sa looting, ug sa pag-ilis sa mga relief goods nga ilang gidala.

Unsaon kaha ni nato pagkorehir no?  Dugay na tang nakadungog ini. Sa una pang mga relief operations sa nangaging mga katalagman nga mihapak sa atong nasud, diin mga relief goods gikan sa gawas, pangilisdan.

Maayo tingali, ang tanang relief goods gikan sa gawas, ipaagi ni sa usa ka coordinating body, nga ang mga tawo ubos ini, dili matintal paghukos-pukos sa mga mahalon nga relief goods. Mga tawo nga motuo ug mahadlok og gaba ug karma.

Kinsa man ni sila? Hai man ni sila? Ni-exist pa ba ni sila karon?