Ang mga kompaniya adunay gitawag og management prerogative nga diin pinaagi niini ang gobiyerno dili manghilabot kanila kun unsaon nila sa pag-hire, pag assign ug pag-manage ang ilang kompaniya. Apan mamahimo ba silang makabutang isip kondisyon sa employment nga did-an nila sa pagminyo ang ilang empleyado? Kana nga pangutana ang atong tubagon karon sa atong column.
“Dear Atty. Divine,
Nagtrabaho ko sa usa ka kompaniya sud sa duha ka tuig. Ang nature sa akong trabaho magsige og byahe. Karong tuiga nagplano ko nga magminyo sa akong boyfriend nga usa ka OFW. Nananghid ko sa akong manager nga mo-leave aron makaandam sa among kasal apan nakurat na lang ko sa iyang gisulti nako nga dili kuno ko pwede nga magminyo tungod kay maapektuhan ang akong trabaho. Mao kuno kini ang palisiya sa among company ug kun magminyo gyud ko hayan mataktak ko sa akong trabaho. Ang akong pangutana atty. kun makapugong ba diay ang kompaniya kun gusto magminyo ang ilang empleyado? Mamahimo ba kong taktakon sa kompaniya kun ako magminyo? Hinaut nga imo kong mahatagan og katin-awan ning akong problema. Daghang Salamat. — Rica
Dear Rica,
Kanang palisiya nga gipatuman sa inyong kompaniya nga nagdili sa ilang empleyado sa pagminyo dako kanang kalapasan sa atong Labor Code. Basi sa Article 136 sa Labor Code of the Philippines kini nagkanayon: “ART. 136. Stipulation against marriage. – It shall be unlawful for an employer to require as a condition of employment or continuation of employment that a woman employee shall not get married, or to stipulate expressly or tacitly that upon getting married, a woman employee shall be deemed resigned or separated, or to actually dismiss, discharge, discriminate or otherwise prejudice a woman employee merely by reason of her marriage.†Sa ato pa. Klaro kaayo sa maong balaod nga dili mamahimong himoon nilang kondisyon o qualification ang kalabot sa kaminyuon kay matawag kana nga discrimination sa mga babayeng empleyado. Buot ipasabot nga kanang maong palisiya sa imong kompaniya makonsiderar kana nga illegal ug dili kana mamahimo nilang ipatuman.
Aduna nay daghang mga desisyon ang Korte Suprema kalabot niini nga nagkanayon nga ang babaye nga empleyado dili mamahimong palagpoton sa iyang trabaho tungod lang sa iyang pagminyo o tungod sa iyang pagpamakak sa iyang civil status sa iyang application letter. Matud sa Korte Suprema nga kun mo-insister ang employer sa pagpatuman sa maong palisiya kinahanglan nga ilang pamatud-an ang panginahanglan sa pagpatuman niini. (Star Paper Corporation vs. Simbol, G.R. No. 164774, April 12, 2006). Hinaut nga akong natubag ang imong pangutana. Thanks and God Bless. — Atty. Divine
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana matag adlaw’ng Miyerkules ug Domingo pinaagi sa akong column.