Nagkadaiya ang mga hinabang nga gikan sa sud ug gawas sa nasud alang sa mga nabiktima sa mga katalagman nga mihasi sa nasud.
May kalamidad nga mugna sa tawo, apan naglabi ang mugna sa kinaiyahan.
Kasagaran sa mga hinabang mga pagkaon, kun may salapi man apan sa gihapon ipamalit kini og pagkaon nga maoy nag-unang gikinahanglan sa mga biktima.
Gikan sa gubat sa Zamboanga nga mugna sa tawo, gisundan kini sa linog, nga nakapahapay sa mga lalawigan sa Cebu ug Bohol, apan ang Bohol maoy nakasinati sa grabing kadaot sa mga kabtangan ug sa kinabuhi.
Niining bag-o ang labing kusog nga bagyo sa tibuok kalibotan nga ginganlan og Yolanda maoy nakapahapay sa syudad sa Tacloban, mga kalungsoran sa Samar ug Cebu.
Busa tungod sa maong mga kahasol nga nasinatian sa mga Filipino, milihok ang mga kagamhanan sa gawas nga mga nasud aron mohinabang sa mga biktima.
Wa kini magpasabot nga gisilotan ang Pilipinas tungod sa kadaghang kawatan sa mga namunoan niini.
Kay kun silot kini, mura’g salikwaot kaayo kay nahilakip man ang mga kabus nga unta maoy saguponon kaayo sa kagamhanan.
Apan bisan pa niini wa magmakuli ang mga nasud sa gawas sa pagbubo sa ilang mga hinabang.
Ang wa lang hisayri sa kadaghanan kun makaabot ba kaha kining tanang hinabang ngadto sa mga tabanganan.