Padre i-pray over ko bi

Nahimong kabahin sa akong sistema ingon nga tawo ang moduda gayud sa kamatuoran sa bisan unsang hilisgutan. Daghan ko og mga pangutana. Mao nga kun bisan kapila ko ingnon nila nga mihilak ang imahen sa Mahal nga Birhen Maria dili ko motuo hangtud nga mapupos ang paagi ug sukaranan nga gilatid sa siyensiya.

Bisan gani sa mga higayon human sa Misa dunay moduol nako ug mohangyo: “Padre i-pray over ko bi!” Alang nako ila lamang sa mga Charismatics apan aron dili masagmuyo ang miduol akong itapion ang akong mga kamot uban ang paglitok sa mga pag-ampo alang sa kaayohan.

Ug human sa maong hamubo nga pag-ampo ang tawo nga nihangyo mapasalamaton kaayo nga imong gihimo ang yanong buhat sa kaluoy.

Apan ang maong hangyo ni bisan kinsa aron lamang makabaton og kaayohan kabahin lamang sa halapad nga misteryo sa dakong tinguha sa tawo nga makalingkawas sa bisan unsang bation og sakit.

Ug kun maghisgot kita og balatian dili lang kini lawasnon, kun dili usab emosyonal ug espirituhanon. Ang matag balatian ang moresulta gyud og pag-antos sa hingtungdan ug sa mga tawo nga nagpalibot sa maong tawo. Husto gyud si Gautama Buddha sa iyang pagpanudlo. (Sumpayan pa)