Snake massage

Naay matang sa masahe nga gikabuangan karon sa mga Indonesian alang sa mga tawo nga gusto lang mag-relax ug pag-wala sa strees.

Dagkong bitin ang gigamit sa pagmasahe o ang bitin maoy momasahe.

* * *

Pahigdaon ang masahiunon nga naghubo. Shorts lang ang salimbong. Unya pakamangkamangon ang dakong bitin sa lawas sa tawo diin duha ka attendants ang nagbantay.

Way kuyaw nga mapaakan sa bitin ang pasyente kay ang baba sa mananap sinirad-an og higpit sa tape.

* * *

Usa ra ka dapit ang nangmasahe og bitin kay dili pa man kini popular nga matang sa masahe. Ang Bali Heritage Reflexology and Spa mao pa roy nagatanyag sa gitawag nga Snake Massage diin ang bayad matag session 380,000 rupiah (US$43).

* * *

Suma pa sa mga nakasuway niining matang sa masahe, nindot kuno ang feeling kay kugihan man ang bitin magkamangkamang ug duna sab kini’g igong kabug-aton.

* * *

Kadtong mga hadlukan og bitin nga nisuway ning matang sa masahe, nawa ang ilang “fear of snakes”.

Ang Spa nga mitanyag og snake massage adunay lima ka dagkong bitin nga maoy mo-service sa mga suking masahiunon.

* * *

Kining balitaa kinutlo sa artikulo sa Agence France Presse nga gipatik sa Philippine STAR.

* * *

SA LAING BAHIN ... Magpasalamat kita sa atong mga magbabasa diha sa Argao, Sibonga, Dalaguete, ug uban pang kasikbit nga  mga lungsod.