Pamolitika sa mga barangay captain

Usa ka chapter president, misugilon kanato nga kuno, tungod kay nakontrahan siya sa ilang barangay captain, ang iyang grupo waa bahini sa 1% nga gahin. Ang tanan didto punta sa grupo nga gitukod sa kapitan.

Ngil-ad paminawon no? Lagmit mao usab kini ang nahitabo sa ubang mga barangay nga nagkatibulaag ang mga senior citizen … gumikan sa politika. Pastilan!

Maoy atong panghinaut nga ang miaging eleksyon nakahatag og higayon sa mga kapitan sa barangay pag-resolve nga dili nila duhigan sa politika ang mga senior citizen. Ang nahitabo sa uban, nagtukod gyud sila og kaugalingong pundok sa mga senior citizen, pag-alkontra sa pundok kansang presidente waa niya mahiuyoni … gumikan sa politika. Pastilan!

Isip amahan sa barangay, amahan siya sa tanan, regardless sa bulok sa politika. Ug tungod kay ang tagsatagsa kanato, aduna may personal nga hilig sa politika, tahuron unta kini sa atong mga amahan sa barangay … ug dili maoy himuon nga hinungdan nga ma-selective na ang ilang pag-alagad.

Hinaut usab nga mao kini ang sundon sa city hall, nga mabulahan ang tanan, nga ikahatag ang mga mehoras ngadto sa tanang barangay, bisag kaatbang sa politika ang kapitan. Mora man gud og binata nga matang sa pagpangatungdanan, kun pananglitan, duna kay ihatag nga sakyanan ngadto sa barangay, apan tungod kay dili imo ang kapitan, adto nimo ihatag sa imong konsehal. Kataw-anan no?

Sama sa miaging pagpanghatag sa cash assistance, ang mga chapter president ug mga kapitan sa barangay nga gitumbok nga kaatbang sa politika, waa hatagi sa master list sa mga senior citizen. Politika.

Kun mao kini ang attitude sa atong mga political leader, diin subra ang pagpamolitika, dili gayud magmauswagon ang atong nasud. This early, pananglitan, ang atong mga politician naglantaw ug nangandam na sa 2016 presidential elections.

Si Vice President Binay, ato nang igkita bisag asang dapit sa nasud, ug ang mga kaatbang ni Noynoy nagsige nag pangita og mga sayop ug kalapasan sa Presidente. Ug natural, aduna kini epekto dinhi sa mga lalawigan.

Ug kun dili man kalikayan ang pamolitika, kay mora man og hilantan ang mga politiko kun dili mamolitika (bahala nag masakripisyo ang serbisyo), unta, dili nila iangin ang mga senior citizen. Unta, himuong usa sa mga priorities sa mga kapitan sa barangay ang paghiusa sa mga senior citizen ug sa dili pagpinig sa ilang pag-deliver sa services.

Mahimo kaha ni ninyo, Kap?