Daghang mga tiguwang botante didto sa kauluhan ang nangreklamo bahin sa lugar diin nila ihug ang ilang balota.
Suma pa sa mga report sa media, dihay usa ka polling place diin gihatagan og reception area ang mga senior citizens ug persons with disabilities (PWDs) sa silong sa usa ka upat ka andana nga bilding apan adto nila ihug ang ilang balota sa ika-upat nga andana.
* * *
Matud pa sa usa ka periodista, maglisud man gani saka og tulo lang ka ang-ang nga hagdan ang mga tiguwang, pasak-on pa gyud sa ika-upat nga andana sa bilding diin nahimutang ang urna sa balota kon ballot box.
Usa ra kini sa daghang depekto sa miaging barangay eleksyon diin ang mga senior citizen ug PWD nga mga botante ang naapektohan.
* * *
Usa ka tiguwang botante sa usa ka eskuylahan sa Metro Manila nanghinaut nga kakoreksyonan kining maong depekto sunod nga eleksyon.
Ambot kaha dinhi sa ato kun diha bay mga problemang ingon niini. Angay nga makoreksyonan alang sa atong mga seniors ug PWDs kinsa bisan sa kalisud sa ilang situwasyon naninguha lang gihapon sa pagtuman sa ilang gitawag nato nga civic duty.
* * *
SA LAING BAHIN ... Atong nasayran nga kadaghanan sa mga nanagan sa miaging piniliay mga managsilingan ra ug dihay usa ka barangay diin ang tulo ka kandidato pagka kapitan mga sakop ra sa usa ka pamilya ... Daghang salamat sa atong mga higala diha sa Alumnus ug Cabreros kinsa nagpadayon ang suporta sa Banat News.