Wala kamo mauwaw?

Sa akong pagsuroy sa lainlaing kabarangayan sa dakbayan sa Sugbo, wala pa gayud ko’y nakit-an nga mga barangay nga ang mga opisyal hingpit nga nakapugong sa ilang lumulopyo paggamit sa aseras alang sa ilang kabalayan.

Mga walay political will. Maayo lang modawat og honoraryom sa barangay, ug kang-kang lang kamot nga mokobra sa dugang honoraryom nila sa City Hall apan walay klaro’ng trabaho.

Ako gani nga panagsa ra makaanha sa mga barangay gisamokan man kaayo nga magtan-aw, apan kining maong mga opisyal sa barangay nagpabuta-buta lang tingali.

Sa miaging Biyernes didto ko sa Barangay Pasil ug Barangay Suba, pwerteng samoka. Dunay mga aseras nga dili kaagian og tawo kay gipangbutangan og mga butang sa tagbalay.

Ang ubang aseras sa Barangay Suba gisemento ug gipabungdo nga kun imong tan-awon mora’g kabahin na sa balay. Unsa may gihimo ni Kapitan Roger Resureccion? Wala ka mauwaw ani Capt?

Nakasuroy ‘sab ko nianang karsada luyo sa kaniadto ihawan sa Lorega-San Miguel kaniadtong miaging gabii ug naobserbahan nako nga duna gihapo’y mga balay nga misaylo sa limit.

Paita g’yud tawon ninyo uy. Kun may sunog dihang lugara, ang mga bombero dili gayud makasulod ug sigurado ko nga maugdaw na lang ang mga balay.

Kamong mga barangay kapitan angay’ng dili gayud ninyo tugotan nga kining mga tawo nga mapahimuslanon sa higayon mopalapad sa ilang kabalayan ngadto na sa aseras, ug ang uban migamit pa’s karsada.

Bisan og ang kabahin sa balay nga gi-extend tua ra sa ibabaw, dili gihapon kini angay’ng tugotan. Kadtong mga opisyal sa barangay nga nangaigo niining akong lindog, angay’ng mauwaw.

Duna ra ba’y ubang mga opisyal nga maigo masuko ug mobawos pagpangataki, dili na lang moluom ug magbag-o na.

* * *

Pastilan, unsaon kaha pagpasabot sa nagdumala kaniadto sa City School Board sa dakbayan sa Sugbo nga ang usa ka school building nga gitukod sa San Nicolas Elementary School sa dalan Carlock wala may hagdan nga gitukod?

Aw, sigurado ko nga kun pangutan-on mohatag lang gihapon og “buktot” nga mga rason. Ngano gud tawon nga ang building gitukod nga walay hagdan? Sigurado ko nga kay wala may hagdan ang maong building, minus ra g’yud ang kantidad niini.

Dili gayud malikayan nga makaduda kita nga adunay nakakwarta. Sayonan ka nga ang maong building igo lang mikonektar sa katupad nga school building ug gibutangan og mora’g latayanan aron ang mga tinun-an ug maestra makagamit sa hagdan sa pikas building?

Kun may sunog nga dia magsugod dapit sa hagdan, asa man moagi ang mga bata sa building nga walay hagdan? Asa na gud tawon ang inyong utok?