Serbisyo sa barangay

Nakahinabi ko og mga tawo nga kaniadto nahimo nga “Teniente del Barrio,” ang katungdanan sa barangay nga karon gitawag na og “Kapitan,” nga mihulagway g’yud nga daghan na ang nag-apas sa mao nga katungdanan tungod sa dagku nga honoraryom mata’g buwan.

Kaniadto gud sa mga tuig 1950 ngadto sa 1964, walay honoraryom ang mahimong teniente del barrio, sila pa gani maoy makagasto kun dunay mga emerhensya nga mahitabo sa ilang lumolupyo.

Sa wala pa ang teniente del barrio, ang ngalan sa pangulo sa barangay gitawag og “Cabeza de Barangay” nga sa ato pa siya ang utok ug nagdumala sa barrio. Pagka 1964, gipausab ang Teniente del Barrio ngadto na sa kapitan.

Mora’g tan-aw nako nga ang mga tawo nga motinguha kaniadto nga mahimong pangulo sa barangay ang gilantaw mao ra gayud ang pagserbisyo, dili sama karon nga may sagol na personal interest kay dagku na man kaayo ang honoraryom.

Mao man gani nga daghang mga motinguha nga modaug g’yud mamalit na lang og botos. Matud sa usa ka kanhi Teniente del Barrio nga kinahanglan nga kadtong magtinguha nga moalagad sa barangay duna g’yud untay “puso at damdamin sa pagserbisyo.”

Kamo, naa mo ani? Unya ang lain pa mao ang tulo ka “C.” Mao kini ang Competent, Committed ug Character.

Ang competent kay kun wala ka go’y igong kahibawo sama anang uban nga magkurog gani bisan pagsuwat sa ilang ngalan, daku man ang posibilidad nga masayon-sayon ra sila pagpapirma og tinonto nga papeles.

Unya, Committed aron sila matinud-anon sa serbisyo. Dili sama anang uban nga molansar pagka kapitan diha sa probinsya apan dia nagtrabaho sa dakbayan, unsaon nila pagserbisyo? Dili ba klaro nga ang giapas mao ra ang dungog ug ang honoraryom?

Ang Character importante kay kinahanglan nga ang usa ka opisyal sa barangay sayon nga duolon ug kapangayoan og tabang apan sayon usab pangitaon. Dili kay sayon ra duolon apan lisud makit-an.

Ang pilia ninyo sa eleksyon karong Oktubre 28 mao kadtong takus kaayo sa ilang katungdanan unya.

* * *

Kaniadtong Biyernes, nagkaguliyang ra ang mga kandidato nga nangampanya. Sugat-sugat lang ang masi’g ka grupo. Sa Barangay Lorega-San Miguel gikasugat nako ang nangampanya nga grupo ni Retired Police Officer Romy Carreon nga gisuportahan sa mayor.

Sila maoy labing lig-on nga makigsangka sa grupo ni Kapitan Fritz Herrera nga alyado sa Bando Osmeña Pundok-Kauswagan (BOPK). Matud ni Carreon nga gipasaligan siya sa mayor nga pabahaan og proyekto ang Lorega-San Miguel kun modaug siya karong eleksyon.