Hangtod sa sunod bangga?

Tulo ka buwan na human sa panagbangga sa MV St. Thomas Aquinas 1 ug MV Sulpicio Express 7 nga nisangpot sa pagkalunod sa Aquinas, pagkamatay ug pagka-missing sa kapin sa gatos ka pasahero ug tripulante ug sa lapad nga oil spill nga nakagusbat sa panginabuhi sa kaliboan ka mangingisda ug mamaligyaay og isda ug nakahulga sa industriya sa turismo ug ubang patigayon.

Apan ang kalapad sa kadaot ug pagbangotan nga namugna sa trahedya wa makapapugwat sa hingtungdan nga mga buhatan sa gobyerno ug pribadong sektor. Gawas nga gitagoan pa sa Department of Transportation and Communication ang sangpotanan sa imbestigasyon padayong giyak-an ang mga rekomendasyon sa Special Board of Marine Inquiry.

* * *

Napahinumdoman ang mga biktima sa katalagman nga wa pay nasilotan sa bisan usa sa mga responsable ni napatuman nga bisan unsang kausaban aron nga di masubli ang panagbangga sa mga barko sa apiki nga Lauis Ledge sa kadagatan sa Talisay City sa habagatang Sugbo tungod sa pagsugod sa imbestigasyon sa Senado gahapon.

Kanus-a gidapit ang mga tagduma ug mga tripulante sa mga kompaniya sa barko ug kadagkoan sa mga ahensiya nga nag-imbestigar sa trahedya. Gawas nga nabisto nga wa pay bisan usa ka kaso nga napasaka, nahibaw-an pa gyod nga wa pay nasuspenso sa mga kapitan ug mga tripulante nga nahilambigit sa panagbangga sa duha ka barko.

* * *

Dakong insulto sa mga biktima ang lusot ni Atty. Jimmy Vibal, abogado sa kapitan sa Sulpicio Express nga si Rolito Gilo: Wa pa suspensoha si Gilo hangtod karon kay siya ang gitahasan sa pag-ayo sa MV Sulpicio Express 7 nga bisan wa malunod naggusbat pag-ayo human sa panagbangga sa MV St. Thomas Aquinas 1.

Apan bisan mahingpit nang pag-ayo sa barko, si Vibal nitataw nang daan nga way silot nga mapahamtang batok ni Gilo. Kay niinsistir siya nga di si Gilo maoy nagpabaya sa panagbangga sa duha ka barko niadtong Agosto 16.

* * *

Mga senador, di ang mga biktima sa trahedya, maoy unang gipahibawo sa Philippine Coast Guard sa sangpotanan sa ilang imbestigasyon: Nga ang MV Sulpicio Express 7, ang barko nga giduma ni Gilo, maoy sad-an sa panagbangga; kay didto nisubay sa lane nga alang unta sa ilang gikasugat nga MV St. Thomas Aquinas 1.

Matod ni Rear Admiral Rodolfo Isorena, commandant sa PCG, nga ang presensiya sa barko ni Gilo sa inbound lane sa Lauis Ledge maoy nakamugna sa kalibog nga nisangpot sa panagbangga. Hinaot nga ang pagpanginlabot sa mga senador maka-apura sa resolusyon ug di makadugang sa kaguliyang sa trahedya. Ug hinaot nga gawas sa nalangay’ng mga suspenso may maposasan ug mapriso sa mga sad-an ug mahimo nang mas luwas ang paglawig sa mga pasahero.

* * *

Email: [email protected]