Mr. Barangay

Nailhan na gyud ang ubang magpapili alang sa umaabot nga barangay election human sugdi ang pagdawat sa mga Certificate of Candidacy niadtong Biyernes Oktubre 11. Pero ang uban magpaabot pa sa katapusang adlaw una pa moduso sa ilang Certificate of Candidacy aron makapahimulos pa sila sa pagpangampanya kay wala pa man ang campaign period. Duna say ubang mga kauban namo sa media ang magpapili sa nagkadaiyang posisyon sa barangay, usa na niini si Konsehal Tantan Sabalones sa Pasil nga magpapili na pagka-kapitan sa brgy Tungasan, (Olango Island) Lapulapu City, Junie Gelbolingo ug konsehal Alan Majait sa brgy Apas, Joel Acido ug Tripon Morales sa brgy Bacayan ug daghan pa. So good luck ninyong tanan hinaut nga makatabang sa inyong tinguha ang inyong pagkasakop sa media.

BRGY POBLACION, CARCAR CITY

“Ireklamo lang unta namo ning tindahan sulod sa merkado kay patuyang mag pataas sa presyo labi na sa uniform sa girl scout, maayo untang masusi unta kini sa taga DTI aron mahunong ilang gihimo.”

BRGY PASIL, CEBU CITY

“Sir Jun patabang unta mi diri sa Lawis kay grabe na gyod kaayo ang pusher diri wa na may kahadlok mura na man lang og sigarilyo ang pagpamaligya’g shabu daghan sad kaayo ni sila’g mga runner ug mamarukay.”

BRGY MASLOG, DANAO CITY

“Manawagan unta mi sa kapolisan ug sa mga opisyal namo diri sa barangay nga mohimo nag aksyon aning shabu labi na sa sitio Pag-utlan kay kuyawan ming mograbi ning problemaha kun dili masumpo.”

BRGY CAMPO 8, TOLEDO CITY

“Diri dapit sa among basketbolan luyo sa stage naay tangkal sa baboy nga pwerteng bahoa luoy ming mga silingan, giari na man unta ni sa taga City Health pero wala man gihapon mihunong.”

BRGY COGON, COMPOSTELA, CEBU

“Naunsa na man ning among mga tanod nga maglakaw man kun mag roving nga unta naa may tulo ka mga sakyanan ang barangay nga multicab, wa diay na ipagamit sa kapitan?"

BRGY MAMBALING, CEBU CITY

“Amo lang unta ning ireklamo ning mga manaygunay og jeep kay kuyawan man ta kay mga tulisan man kaayo’g dagway diri sa may Natalio Bacalso, maayo unta’g masumpo ni sa mga polis.”

BRGY SUNGKO, BANTAYAN, CEBU

“Naunsa na man ning among mga opisyal sa barangay labi na sa among kapitan wala man gyod kapaayo sa gubaon namong karsada, unsa may ilang gihimo sa ilang paglingkod.”

BRGY LAHUG, CEBU CITY

“Tulo ka buwan na man ning poste sa suga sa VECO  diri sa Salinas drive wala man gihapon aksyoni nga dugay na man ni namong gireklamo, mao ni mga post number sir v0033100 ug v0033792.”

BRGY SAMOSA, TABOGON, CEBU

“Kaning mga nanag-iya og katubhan ipaayo nila nagubang aspalto sa karsada tungod sa ilang dumptruck nga lapok kaayo ang ligid nga maoy nakabuslot luoy kaayo ang ubang motorista.”

Alang sa inyong mga reklamo text lang sa 09071678643