Magpatay kay dili paalkansi

Miarangkada na gayud ang umaabot nga eleksiyon sa barangay. Kini sa dihang nagsugod na ang pag-file sa certificate of candidacy sa modagan pagka-kapitan ug konsehal sa barangay.

Kaniadtong Biyernes, midagsa sa buhatan sa Commission on Elections ang mga buot mokandidato sa piniliay sa Oktubre 28.  Kutob lamang sa Oktubre 17 ang pag-file sa CoC.

Hinuon gipangandaman na sa kapolisan ang maong bugnong lugaynon. Nakapuwesto na ang pipila kanila sa pipila ka lugar aron pagmintenar sa kahusay ug kalinaw.

Ug manghinaut kita nga kalinaw gayud ang magpatigbabaw niining mga adlawa hangtud na sa adlaw sa piniliay. Kini bisan pa man sa ka init sa politika sa mga managkabanging politiko.

Hinuon dili gayud kalikayan ang gubot nga motumaw matag eleksiyon. Adunay mga kandidato nga buhaton ang tanan aron gayud modaug.

Kini miresulta na usahay sa dugoon nga panghitabo gumikan lagi kay puro dili paalkansi. Hinungdan nga daghan ang maangol ug mamatay.

Ambot nganong dugoon man gayud ang eleksiyon ning atong nasud. Kini bisan pa man sa pahimangno ug panawagan sa otoridad alang sa malinawon nga piniliay.

Sa akong nakita, tungod lagi sa kahakog sa gahum hinungdan nga magpatay kining ubang mga political rivals. Dili gayud sila kadawat og kapildihan.

Kanus-a pa kaha maedukar ang atong mga politiko sa ka sagrado sa bugnong lugaynon? Siguro, agta ray nasayod.