Talaw sa dagko

Dihang gipabalhin ni Cebu City Mayor Mike Rama ang mga molupyo sa tampi sa suba sa Mahiga, atubangan sa sunudsunod nga pagbaha ug pagdahili sa yuta ug ubang bahin sa nasud, niabiba ko niya. Uban ang awhag nga tumanon niya ang batakan nga lagda sa pagpangita og tukma nga relocation site alang sa maapektahan nga mga pamilya.

Apan gidasonan nakong kabalaka sa ubang nagpakabana nga mga sektor nga maayo lang siyang moapiki sa mga gagmay. Nga sama sa gisundang mga pamunoan inutil siya sa pagbadlong sa dagkong mga negosyante nga way pupanagana nga nibabag ug nitabon gyod gani sa mga sapa.

* * *

Dihang nideklarar si Rama nga way gipili ang iyang kampanya paghawan sa mga sapa, nadasig ko. Tingali tinuod gyod siyang may political will. Pagkahibawo nako nga gipatawag sa iyang buhatan ang mga negosyante nga may buildings duol sa mga sapa, nagsugod na ko og bilib.

Labi na dihang gipahibawo kong Edison Delos Angeles sa DYAB Radyo Patrol nga gipasidan-an sa mga abogado sa City Hall ang mga negosyante nga nitambong sa tigom nga ang kaisog ni Mayor Rama pagsukol sa kasong gipasaka sa mga molupyo sa Mahiga mao say gamiton kun magmagahi sila pagguba sa ilang mga istruktura nga nagtungtong na sa tampi sa suba.

* * *

Nahugno hinuon ko dihang gibasa ni Edison ang listahan sa mga nanambong sa tigom: Way bisan usa sa dagkong negosyante nga nibabag ug nitabon gyod gani sa suba sa Mahiga ang nitambong. Ambot gipatawag ba ug nangisnab lang. O sa imbitasyon pa lang nagpangikog na ang City Hall.

Kay ang mga negosyante nga way pupanagana nga nagpabarug og buildings sa Mahiga pulos aktibo nga nagpaluyo ni Rama sa niaging piniliay. Maong nagsugod na ko og duda. Nga ang determinasyon ni Rama paghawan sa mga sapa kalabwan lang sa iyang kamapasalamaton sa mga negosyante nga nakatabang niya pagpukan ni kanhi mayor Tommy Osmeña.

* * *

Komprehensibo ang gilatid sa pamunoang Rama nga sulbad sa pag-awas sa mga suba: Pagpalawom sa mga suba; pagpalapad sa mga suba; pagdili na paglabay og mga basura sa suba; ug pagpapahawa sa mga molupyo ug pagdili na pagtukod og bag-ong kabalayan sa mga suba.

May dakong kuwang. Gawas sa sulti, wa pakita si Rama og timaan nga mangisog sab siya batok sa dagkong mga negosyante. Maong samtang giapiki na niya ang kabos nga mga molupyo, wa gyod makaako pagtandog, bisan pitik na lang sa dunggan, sa mga negosyante nga mas grabe ang kalapasan--pagtukod og building ibabaw gyod sa sapa, pagpasimang sa sapa, o pagtabon gyod sa agianan sa suba. Bilib tingali si Rama sa pagtandi sa balaod ngadto sa bay sa lawalawa--ang langaw masangit, ang kabaw molusot.

* * *

E-mail:  [email protected]