Napulo ka mga opisyal sa probinsiya sa Sugbo ang gikatakdang mobiyahi paingon sa Amerika sunod buwan aron kuno mohimo og “study tour†aron makat-on sa pamaagi unsay epektibo nga programa sa drug rehabilitation.
Ang 10 ka mga opisyal nga mobiyahi karong Nobiyembre 10 hangtud sa 16 naglakip nila ni bokal Peter John Calderon, Jude Thaddeus Sybico, Julian Daan, Raul Alcoseba, Grecilda Sanchez, Joven Mondigo, Jr., Sun Shimura, Miguel Antonio Magpale, Arleigh Jay Sitoy, ug Aladin Wilyamie Caminero.
Motambong sila sa usa ka workshop ug study tour didto sa Daytop Village sa New York. Ang mosunod maoy mga topics sa workshop; “Treatment and Rehabilitation: Diverse Intervention and Treatment Approaches; Clinical challenges and integration of best practices in drug treatment; and theory of addiction and the therapeutic community.â€
Ang maong workshop dunay registration nga $1,500 matag-usa. Sa ato pa kinahanglang mobayad ang probinsiya og P64,500 matag usa ka board member sa registration pa lang way labot sa plete ug hotel ingon man sa pocket money.
Dakong kantidad sa kwarta ang gikinahanglan alang sa maong biyahe tungod kay ang sumada sa registration kun atong basihan ang kasamtangan nga exchange rate nga P43 matag dolyar moabot sa P645,000.
Kinahanglan ba gyud nga ingon niini kadaghan ang motambong sa workshop? Kun ingon niini ka mahinungdanon ang maong kalihukan, dili ba iskandalosong tan-awon nga ang chairman hinuon sa committee on dangerous drugs sa hunta probinsiya nga si Carmen Remedios Meca dili mouban sa biyahe unya ang outgoing nga ex-officio member nga si Caminero tua?
Unsa may angayang tun-an sa mga opisyal sa pagpadagan og drug rehabilitation center nga wala man gani’y kaugalingon nga drug rehabilitation center ang lalawigan? Dili kaha maayo nga magtukod usa ta og center sa dili pa ta magtuon unsaon pagpadagan? Dili kaha laag ra gyuy giapas niining maong mga opisyal, unsa ang gobyerno maoy pagastohon?
Nahibawo ko nga makabayad mo alang sa inyong personal nga biyahe, mao nga ayaw intawon ninyo pahimusli ang inyong pwesto. Naglibog pud ko ni Gobernador Junjun Davide, abi ko ba og nagnihit ang kwarta sa probinsiya unya nganong iya man nga gitugotan nga ingon niini kadaghan ang mobiyahi.
Maayo tingali nga i-review sa gobernador kinsa lay importante ug angayan gyud nga motambong sa maong workshop. Sila maoy atong tugotan nga molarga, apan kadtong wala na kinahanglana, labi pa kadtong mahuman na ang termino unya sa Nobiyembre 30 unsa pa may kapuslanan niya didto?
Dili kaha ni pag-usik-usik sa kwarta sa mga magbubuhis?
* * *