EDITORYAL - Sugarol ug negosyante’g drugas magpapili

Di na kapugngan ang pagkuyanap sa  gidiling drugas  ug ang illegal  nga sugal  sa dakbayan ug  lalawigan  sa  Cebu.

Tungod  niini  gikonpirmar  sa mga  kapolisan  nga  di lamang  karon  kundi  labaw  na  sa umaabot  nga  election sa barangay molutaw  sila  nga  magpapili  sa katawhan.

Busa anaa  na  sa  mga  botante  ang  paghukom  kun  pilion  ba  nila  ang  mga  tawo  nga  maoy nagpadasig  sa krimin  sa  palibot.

Gumikan  sa illegal  nga  sugal  ug  sa  illegal  nga  drugas misaka  ang  krimen  sa palibot.

Pinatyanay,  lugos, tulis, ug  nagkalainlaing  matang sa krimen  nga  mugna  sa  gidiling  drugas  ug  sa  sugal.

Kun  ang  mapili  sa usa ka  barangay , negosyante  og  gidili  nga  drugas, madugay  ug  sa madali  mayoridad  sa mga  molupyo  sa barangay  drug addict.  Kun  di  maboang sa gidiling  druga,  maduhig  sa krimen  nga  himoon  sa drug addict  pinaagi  sa lugos, tulis ug  patay.

Sayon ra man  sila ilhon  sa inyong  barangay,  busa  kun palutson  sa  katawhan  ang  maong  mga  tawo  sa  ilang  barangay  nagpasabot  nga  mosuporta  sila  sa kawsa  niini  sa  paghimong  criminal  sa  mga  adis-adis.

Gamhanan  ang  kuwarta  ug  kun  mobotar  sila  sa  mga  negosyante  og  gidiling  druga  ug  sa  mga  nagpadagan  og  illegal  nga  sugal  sa ilang  dapit  sama  ra  nga  pabor  sila  sa  pagpalipang  niining  mga  bisyoha  sa ilang  lugar .

Ugma  damlag  mohari  na ang  mga adis-adis sa ilang  lugar  nga   motudlo  sa ilang  mga anak  sa  paghimo og krimen.