Ayaw’g palabi sa katalawan

Gibutyag nako ang akong contact numbers ngadto sa publiko aron daghan ang makahatag og inpormasyon ug maaksyonan ang mga binuang. Apan dunay daghan nga apurado kaayo, pirmi nga magdali nga aksyonan ang ilang reklamo apan dili moabag.

Dunay usa ka informer batok sa gidiling matang sa drugas ug masiao nga gihimo sa usa ka ilado kaayo nga tawo diha sa Medellin, anaa kuno kini magbasi sa Barangay Lamintak Norte, apan talawan pa’s nangamatay.

Isip police ug military reporter sulod sa napulo ka tuig, nasayud na ko nga dili maayo nga itug-an ang inyong mga contact numbers apan sa gihapon nagpabilin ang pagkatalawan aning uban.

Kay ang ilang inpormasyon kuwang man kaayo ug nga gadali man g’yud sila, sagad g’yud nga mohangyo ko nga mohatag og “sketch” sa balay sa maong mga naghimo sa illegal. Ang tumong nako niini nga magiyahan na ang mga polis diri sa Cebu nga dili kaayo malangan.

Unya, paghuwat ra g’yud mo nga aksyonan ang inyong reklamo kay dili man ko “operative” nga maoy modakup ug moronda sa mga illegal. Kabahin ra kini sa akong lindog ang pagdawat sa inyong reklamo.

Ikaduha, magmatngon man ‘sab gud ko kay dunay mga higayon nga usahay makadawat ko og reklamo batok sa illegal nga kalihukan batok sa mga tigpayuhot og drugas/shabu, apan pagsusi nako, ang informer utro pa diay.

Nasayran nako nga gusto ra diay ko nila nga gamiton aron nga madakpan ang mga tawo nga karibal nila sa negosyo sa pagpamaligya sa gidili nga matang sa drugas. Dili nako idetalyi kun ngano nga ako kining mahibaw-an  kay nakat-onan nako ni dihang police/military reporter ko sulod sa napulo ka tuig.

Kamong mga informer, palihug, likayi nga moingon mo nga “ayaw ibutyag ang akong numero sir” kay mawala ang akong bilib ninyo. Usbon nako dili nako ibutyag ang inyong numero apan ayaw na lang pagpaila sa inyong katalawan.

* * *

Sultian nako kamo, kuwang gayud sa pagpaningkamot ang kapolisan aron mapuo ang problema sa drugas ug illegal nga sugal. Unsaon man, kitang mga tawo kun panahon sa eleksyon magpataka man ta og botar sa gusto nato nga himoong opisyal, abi kay atong mga suod bahala na’g dili kamao.

Susiha gud ang inyong konsiyensya kun ang gibotohan ninyo maantigo ba g’yud. Ilabi na karon nga eleksyon sa barangay, ayaw na lang. Bisan ang mga tawo nga magkurog gani mosuwat sa ilang ngalan makadaug kay daghan og kabanay ug mga higala, labi na kadtong gisuportahan sa druglord.

Bakak ba gud ning ako?