Sabotahi sa NFA

Dako ang akong kahibulong kun nganong nagsige og saka ang prisyo sa bugas sa tibuok nasud nga unta namahayag man ang gobyerno ni Pangulong Aquino nga aduna kita’y igong pundo sa gidaghanon sa bugas diin ang maong gidaghanon molungtad kini sa pag-abot sa laing ting-ani. Apan sukwahi sa pamahayag sa pangulo, nagnihit ang bugas sa merkado. Tungod sa pagnihit sa bugas sa merkado, ang mga manindahay og bugas mipamahal sa ilang prisyo. Kun nganong nagnihit ang bugas sa merkado mao ni ang dakong kahibulongan.

Ako nagtuo nga ang bugas gipangtagoan sa mga negosyante og bugas aron ilang mapintal ang hulagway ngadto sa merkado nga nagnihit ang bugas busa makarason na sila sa pagpamahal sa prisyo niini. Ang mga negosyante og bugas nakahimo sa ilang yawan-ong tumong tungod sa ilang pakigkumboya sa mga bag-angang buaya sa National Food Authority (NFA).

Kun wala mo masayod, sultian ko kamo nga ang mga opisyal sa National Food Authority mas kurakot pa kay sa pipila ka mga opisyal sa Bureau of Customs. Tungod sa ilang pagka kurakot gipasagdan lang nangalata ang mga bugas sa ilang bodega bisan og nagnihit na ang bugas, bisan og nagkrisis na sa bugas ang tibuok nasud. Ang bugas nga nagtapok sa daghan nilang mga bodega wala gyod ipagawas ug wala gayod ibaligya sa merkado aron makapatuyang sa ilang yawan-ong tumong ang ilang mga paborito ug nagsige og datong nga mga negosyante og bugas. Kining ilang gihimo dugay na ug hangtod karon sa kagamhanan ni Pangulong Aquino nagpadayon.

Tungod sa kahakog sa mga opisyal sa National Food Authority ang mga bugas nga mga primera klase nga napalit sa gobyerno gikan sa laing kanasuran dili nila ipakaon natong mga kabus kay ila kining ibaligya ngadto sa mga negosyante og bugas. Ang ilang ikaon natong mga kabus ang kadtong mga baho na nga ultimong baboy ug iro mahadlok nang mokaon.

Kamo diha karon sa Sugbo ma-suwerte mo kay dili kaayo baho ang NFA nga bugas nga inyong gikaon pero ako diri karon sa kaulohan kada adlaw kong nagkaon og baho kaayong bugas sa National Food Authority. Maayo gani kay naanad na ko ning pagkaona. Ang ubang wala maanad, dimalas.

Wala ba kamo matingala kun nganong baho ug lagum ang gipamaligyang NFA nga bugas? Dili ba ang bugas nga gipamalit sa NFA ang kadaghanan niini imported man? Nganong baho ug lagum na man ang ilang gipamaligya ug atong napalit? Ayaw ko ingna nga ang atong gobyerno namalit og bugas nga baho ug lagom gikan sa Vietnam? Kun namalit sila og bugas nga baho ug lagom gikan sa Vietnam lain ni nilang dakong tulubagon.

Tungod sa kahakog sa mga opisyal sa National Food Authority ang mga mag - uumang kabus ilang gihigot sa utang tungod kay bisan sa ka mahal sa abuno ug mga gamit sa pag uma, ang abot sa mga mag-uuma paliton lamang og barato.

Karon misamot pag-ayo ang pagpanukob sa mga bag-angang buaya sa National Food Authority tungod kay sila na lamang ang gitahasan sa gobyerno ang pagpalit o pag-angkat og bugas didto sa gawas sa nasud. Kun unsay ilang gihimo niini ngadto sa mga negosyante og bugas, ang imong gituohan mao usab ang ako.

* * *

Bisan wala pa madawat magpasalamat na lang kong daan ni Mayor Mike Rama sa iyang hukom pagpagawas sa tabang salapi sa mga Senior citizens sa dakbayan sa Sugbo ilabi na sa South District. Ang dakbayan gipaabot nga mopagawas sa tabang salapi karong semanaha. Bisan tuod og igo-igo lang ang gidak-on sa kantidad nga madawat sa mga Senior Citizens sa dakbayan sa Sugbo pero igo na kini nga makasapar sa ilang mga panginahanglan. Ang pagpagawas sa tabang salapi ning semanaha makapawagtang na sa kabalaka sa mga Senior Citizens nga dili na sila makadawat og tabang salapi sa dakbayan sa Sugbo.