Dagko ra kaayo uy
Kun dunay subra nga kwarta ang dakbayan sa Sugbo mahimong mohatag kini og cash allowance sa mga huwes sa lainlaing hukmanan apan dili tingali angay nga kun pila ang ilang sweldo mao usab ang gidak-on sa ihatag kanila.
Kun magpirmi ang paghatag og dagku nga cash assistance “mapordoy†man ‘sab ang kagamhanan sa dakbayan.
Sayonan ka nga ang mga huwes nagdawat man og sweldo nga gikan sa P35,000 ngadto sa P60,000 ang buwan apil ang mga justices sa Court of Appeals nga gihatagan ‘sab.
Ang P12 milyones nga gigahin sa City Hall paghatag og allowance sa mga huwes ug justices karong tuiga nahurot na, kutob ra sa tunga sa tuig. Kun dunay allowance nga ihatag gagmay lang gud.
Apan gidayeg g’yud hinoon nako kadtong mga huwes ug justices nga wala g’yud modawat og cash assistance gikan sa mga Local Government Units sama ni Justice Gabriel Ingles ug RTC Judge Meinrado Paredes.
* * *
Nadakpan kuno si Randy Boli-boli sa kapolisan nga gipangulohan sa akong amigo nga si Koronel Rex Derilo. Nanghimakak kuno si Boli-boli nga nagpadayon siya sa pag-operate og masiao.
Pastilan, unsay buot niya ipasabot nga nagtumo-tumo lang ang kapolisan? Ang tinuod dugay na kaayo ni si Randy nag-operate og masiao ug gipanid-an sa kapolisan.
Mao man gani nga girakrakan og mga bala ang pultahan sa iyang gipuy-an diha sa Pasil ug hinungdan nga mitahan siya kaniadto ni Heneral Marcelo Garbo ug mipasalig nga moundang na.
Pagwala ni Garbo dinhi sa Sugbo, hinay-hinay na ‘sab kay abi’g wala na’y mohimo og kampanya. Saludo ko sa akong amigo nga paspas mihimo’g kampanya. Mas maayo tuod nga mibalhin kini si Sir Derilo sa Regional Special Operations Group (RSOG) kay makita ang iyang abilidad. Daan kining abtik si Derilo dihang didto pa sa Criminal Investigation and Detection Group.
Ang mga inpormasyon nga akong madawat, maabot ninyo nga ipasaka nako kang sir Derilo, ang mga dagko lang kay ang mga gagmay, anha lang na sa police station uy.
Awhagon nako ang RSOG nga rondahon ninyo pag-apil ang mga imprintahanan sa mga tipsheets sa masiao nga pulos lang pangilad. Gipatoo nila ang mga tawo nga may duwa pa sa Jai-alai, pastilan.
* * *
Ang naila nga “Engr. King†sa City Hall nga maoy building administrator anaa karon sa ospital ug nabali-bali ang kabukogan. Mora’g leksyon na tingali kini ni “King†kay usahay gud magpaila man siya nga hari.
Kusog kaayo maningka nga mora’g siya na g’yud ang hawod. Dunay iyang sakop nga napikal, gibunal-bunalan si King og tubo nga puthaw, hasta ang ulo, bukton ug gusok. Siyaro’g dili motagam.
- Latest
