SEPTIYEMBRE 29, 2013: Ikakawhaag unom nga Domingo sulod sa tuig Mga Pagbasa: Am. 61a; 4-7/Sal. 146/1 Tim. 6;11-16/Lk. 16;19-31
Kun si Lazaro anaa pa lang sa tugkaran ni Monsenyor Lolong (Teofilo Bastida Camomot, DD) dili tingali siya mag-antus sa kagutom kay kadto si Monsenyor Lolong ang dili na man kinahanglang kuhiton aron lang mopaambit sa iyang bahandi. Tingali pud si Lazaro ang mahisama niadtong tawo nga mobaligya sa makadaghang higayon sa sugnod nga bayran lang sa way dugang kuti sa maong Obispo. Si Dives kun nagkuyog pa sila ni Monsenyor Lolong ang bation og kapikal kay ihatag lamang sa Obispo ang bisan unsang ihatag niya ngadto niini sa dakong kasayon. Hinuon, kining maong pagtandi bunga lamang sa akong imahinasyon apan tingali mahimo pud tingali kay ang pagkamanggihatagon nga gikan sa gugma ang mahitabo lamang sa walay daghan pang langas bisan pa man kun kini nagpasabot og pagtamay ug pagsupak.
Daghan nato ang nakasala sa mga sins of commission ug omission. Daghan ang mogamit sa ilang kakabus o gamiton ang mga kabus aron mangilad sa uban nga dunay malumong kasingkasing. (Commission) sa laing bahin, daghan usab ang nagpakabuta bungol sa kahimtang malisud sa uban gumikan sa bias (omission) nga ang nagpatabang kaabin sa mga mapahimuslanon. Mao nga alang kanako, ang pagkamanggihatagon dili lang gugma kondili sentido komon usab. Diin ang nitabang nadasig aron mopaambit sa panalangin ug ang gitabangan nadasig nga maningkamot ug dili magsalig.
Sa akong pagtagik niini ako usab nasud-ong ang hawan na nakong lawak sa kumbento sa Sogod. Panahon na sa pagbiya aron hatagan og katapusan ang laing anib sa kinabuhi sa parianon ug tawhanong panaw. Dako nakong pasalamat kang Padre Elmer Colina ang masinabtanon nakong Padre Kura sa iyang Kamanggihatagon bisan pa man sa kahagip-ot sa panahon. Sa mga tawo sa kumbento ug sa Parokya nga nakatampo og dako diha sa ilang mga pagpikpik ug mga pagsaway. Sa laing bahin akong gilantaw sa unahan ang usa ka madagayaong panaw sa kinabuhi uban nila ni Monsenyor Dennis Villarojo, Padre Felipe Diacosta, Padre Edgar Sundo, Padre Mat Maneja ingon man sa mga parokyano sa Our Lady of the Sacred Heart Parish, Capitol Cebu City. For sure, daghan kong makat-onan ning progressive nga dapit sa dakbayan.