Dili ba maayo ni?

Nindot g’yud lagi nga ipa-kwentas ang lisensya nga giisyu sa Land Transportation Office (LTO) niadtong mga tawo nga mag-drive og motorsiklo aron mahibaw-an kinsa kadtong dili lisensyado.

Maayo unta og adunay konsehal dinhi sa dakbayan sa Sugbo, ug bisan diha sa ubang mga dakbayan, nga makahuna-huna niini kay makapasayon kini pag-ila kinsa ang dakponon.

Bisan ako, mag-drive man ko usahay og motorsiklo, andam mokwentas sa akong lisensya kun aduna nay mamugna nga balaud sama sa ordinansa. Apan nindot g’yud unta kun ipatuman kini pinaagi sa “national law” aron mapatuman kini sa tibuok nasud. Akong awhagon ang higala nako nga si Kongresista Raul V. Del Mar nga himoan niya kini og balaudnon.

Sa konseho, awhagon nako ang chairman sa committee on transportation ug sa committee on peace and order, nga moduso unta sila og ordinansahon kabahin niini.

Pagka karon gud, pwerteng daghana nga mga tawo nga mag-drive og mga “habal-habal” o mga motorsiklo nga walay lisensya gikan sa LTO – sa ato pa mga dakponon.

Kun ilatid na nga ikwentas ang lisensya, mahimong kadtong mga mosakay og habal-habal motan-aw na kinsa ang ilang sakyan kay daghan ra ba niining walay mga lisensya mga kiat mopadagan.

* * *

Sugod na ang pagpatuman sa 45 ka adlaw nga gunban kabahin sa nagsingabot nga eleksyon sa mga kandidato sa barangay.

Ang nakanindot kay aprobado na ang bag-ong balaud  -- ang Republic Act 10591 – nga nagpalig-on sa kaso batok sa mga madakpan sa pagdala-dala og armas nga walay Gun Ban exemption.

Kaniadto gud ubos sa Republic Act 8294, ang Firearms Law nga miamendar sa Presidential Decree 1866, gilatid man nga dili makonbikto sa illegal possession of firearms ang usa ka tawo kun atul sa iyang pagkasikop nakahimo siya og laing salaud.

Nagpasabot nga kun ang tawo madakpan sa pagdala og dili lisensyado nga armas atul sa pagpatuman sa Gun Ban, adto ra siya makonbikto sa gamay nga kaso – ang election offense.

Ang paglapas sa election law mosilot ra og pagkapriso nga dili molabaw sa unom ka tuig, aw hinoon dili subject og Probation, apan gamay ra kini kay sa silot sa Illegal Possession of Firearms. Sa karaang balaud, ang madakpan nga magdala og armas nga walay lisensya adto ra makonbikto sa Gun Ban ug dili sa illegal possession of firearms.

Ang Section 1 sa Republic Act 8294, naglatid man nga “A person arrested for carrying unlicensed firearm may be convicted of illegal possession of firearm, provided there is no other crime committed.”

Sa RA 10591, giwagtang na kining maong lagda nga gitumong ra kaniadto aron mabuhian si  Robin Padilla.