Seryosong insidente ang nahitabo sa Zamboanga nga anaa na sa ika-walo ka adlaw karon. Di’ sayon alang sa mga residente nga napiit sa maong kaguliyang nga mag-atubang og susamang makalilisang nga gubat. Labaw nang pait ang sitwasyon alang sa mga masakiton nga gawas nga naglisud sa pagpalit og tambal tungod sa pagpanira sa mga botika ug mga tindahan, wa’ gyuy kuwarta sarang ikagasto sa mga panginahanglan. Mas nabutang sa dakong alaot ang mga bata nga wa’ na makatungha tungod kay gisuspenso ang klase ug napiang ang operasyon sa gobyerno tungod kay pipila ka adlaw nga wa’ magbukas ang mga buhatan ug mga produksyon. Kuyaw ang maong insidente sa mga sundawo ug kapulisan nga gipada’ sa maong lugar aron pagsagubang sa mga rebeldeng sakop sa Moro National Liberation Front kon MNLF.
Wa’ pay nahibawo kanus-a mahuman ang kagubot sa Zamboanga ug unsaon nga mahatagan na og katapusan ning tanan. Apan alang ni Bise Presidente Jejomar Binay, aduna nay ceasefire nga nahitabo tali sa pwersa sa gobyerno ug pwersa ni Nur Misuari. Sa salida nga gisuwat ni Binay, giingong nahuman na ang giyera ug andam na ang grupo sa MNLF nga undangon na ang kagubot. Mismo ang taga Malacanang, nakugang sa deklarasyon ni Binay. Bisan ang mga sakop sa gabinete ni Presidente Noynoy Aquino nagnganga dihang gipangutana sa media kun aduna bay nahibaw-an ning deklarasyon ni Binay. Mismo ang kadagkuan sa crisis management team nga tua sa Zamboanga sukad sa unang adlaw ning pagbuto sa kagubot, nakugang sa pamahayag sa bise presidente.
Karon mas tataw na gyud hinuon kinsa ang namolitika ining kagubot sa Zamboanga. Sa unang adlaw pa lang, didto na si Secretary Mar Roxas sa DILG sa dapit ug matag adlaw ang iyang exposure sa media. Nahibaw na ang tanan nga nag-ambisyon ning si Roxas nga modagan pagka-presidente sa 2016. Ang giyera sa Zamboanga ang tukmang panahon aron masukod ning labok ni Roxas sa pagsulbad sa mga krisis sama sa giyera tali sa mga rebelled ug sa kagamhanan. Sa matag adlaw nga pagpahatag og pamahayag sa media, dakong bintaha ni sa iyang kandidatura unya. Bisan kun moingon pa siya nga limpyo ang iyang gihimo ug wa’ siyay hakog nga motibo ining tanan, dakong positibong epekto gihapon ning iyang pag-atubang kanunay sa publiko ug pagsiguro nga malinawon nga matapos ang kagubot didto.
Sukad sa miaging semana, wa’ madunggi ang panga’n ni Bise Presidente Jejomar Binay kinsa bukas ‘sab sa iyang pamahayag nga modagan nga presidente sa 2016. Luyo sa kagubot nga nitumaw sa Zamboanga nga karon nidani pa sa atensyon sa mga tawo sa kalibutan, wa’y panga’ng Binay nga nabutang ining tanan. Apan sa miaging Sabado, nakugang na lang ang tanan sa deklarasyon ni Binay nga nahuman ang giyera didto tungod kay nakiglambigit na siya ug ang pangu’ sa National Defense nga si Voltaire Gazmin sa pwersa sa MNLF. Ang maong pamahayag nakapakugang sa tanan. Di’ kalikayan ang pangutana kung nakatabang ba ning presensya ni Binay o nakasamok lang sa nagpadayong mga tinguha aron nga mahatagan na og katapusan ang kagubot?
Ang tataw sa pagkakaron, kadudahan ang pamahayag ni Binay. Basin tuod namolitika lang aron mahisgutan sa katawhan ug ipatuo sa publiko nga aduna siyay nahimo aron sa pagpahunong sa kagubot. Gipasigarbo ni Binay nga classmate silang Nur Misuari ug aduna siya’y direktang komunikasyon sa gitudlong lider sa MNLF. Tinuod maayo paminawon ang iyang gihimong lakang apan ang pagdeklarar og ceasefire di’ katungod ni Binay apan sa presidente sa Pilipinas mismo. Sakto ka, adunay opisyal nga nagbuot-buot sa pagdeklarar nga wa’ masayod sa tinuod nga kahimtang didto ug sa mamahimong epekto ini sa mga sundawo ug mga sibilyan.
Kung ang pagtabang ang tumong ni Binay, kana maoy usa ka butang nga pakyas siya. Di’ pagtabang ang pagdeklarar og ceasefire nga wa’ mahibaw-i sa mismong mga tawo nga nasayod sa sitwasyon, mga opisyal nga nahimo sa mga lakang aron sa pagsulbad sa krisis ug labaw sa tanan, ang wa’ pagkonsulta sa presidente sa nasud kinsa didto sa Zamboanga aron mangunay sa pagsusi sa sitwasyon. Sa gihimo ni Binay mas tataw na hinuon kinsa ang ‘insecure’ ug kinsa ang nisalida lang aron mamahimong blockbuster sa 2016.
Email: ricolucena@yahoo.com or ricolucena@ilovecomarts.com .