Lihay ni PNoy
Posibling masang-at na karong adlawa ang kasong plunder batok sa giingo'ng utok sa P10 billion pork barrel scam nga si Janet Lim Napoles ug sa mga kakonsabo niini nga mga magbabalaud.
Ang Department of Justice nagdumili pa pagtug-an sa mga pangalan sa mga senador ug kongresista nga malakip sa kaso, apan sibaw ang pagtuo nga apil sa kasohan mao sila si Senador Juan Ponce Enrile, Jinggoy Estrada, Bong Revilla, ug uban pang senador ug kongresista nga gilambigit paghatag sa ilang pork barrel ngadto sa mga mini nga foundation ni Napoles.
Apan sa mga pangalan nga nitumaw, makaduda nga way mga kaalyado sa presidente. Dili ko'ng motuo nga way mga sakop sa administrasyon nga nakigkonsabo ni Napoles. Gigamit ba lang sa administrasyon ang isyu aron pagpanglutos sa ilang kontra ug ang mga kauban sa partido ilang giprotihian?
Sa kalapad sa network ni Napoles, sigun sa pamahayag sa iyang ig-agaw nga si Benhur Luy, imposibling tuohan nga wa gyuy sakop sa Liberal Party nga nalambigit.
Dunay sukaranan ang akong pagtahap tungod kay ang mga hulagway nga mikatap sa Internet nga nagpakita sa presidente uban ni Napoles ug ingon man sa anak niini nga si Jeane naghatag kanato sa hubo nga kamatuoran nga mismo si Aquino suod sa mga Napoles o ba kaha dunay suod si Aquino nga maoy higala sa maong pamilya.
Tulukibon ang tataw nga tinguha ni Aquino nga modistansiya sa iyang kaugalingon gikan sa mga Napoles. Matud ni Aquino wala siya makaila ni Napoles ug wala sila magkakita niini. Apan nikuyanap sa Internet ang iyang hulagway uban sa anak ni Napoles. Human mabisto ang iyang pamakak, napugos og pagawas ang Malakanyang sa ilang gitaguan nga mga hulagway nga nagpakita ni Napoles mismo ug sa presidente.
Ang maong mga hulagway nakuha kuno sa usa ka kalihukan nga gitambongan ni Aquino dinhi sa Sugbo sa miaging tuig. Apan dali nga gipasabot ni Secretary Ricky Carandang nga wala magpasabot ang hulagway nga guilty na sab si Aquino. Matud ni Carandang si bisan kinsa mamahimo nga mopakuha og hulagway uban sa presidente.
Laing bakak, dili tinuod nga si bisan kinsa makahimo pagduol sa presidente aron pagpakuha og hulagway uban niya. Bisan gani kaming sakop sa media nga mitambong sa iyang press conference koralon pa og pisi aron dili makapaduol niya.
Hugot ang siguridad sa presidente busa kadtong mga pakuha og hulagway niya kadto ra sab ang mga tawo nga suod niya ug nailhan sa iyang mga gwardiya o ba kaha kadtong mga suod sa suod sa presidente.
Unya motuo ta nga wala siya kaila ni Napoles kun kini yanong nakapakuha og hulagway uban niya?
Laing lig-on nga ebidensiya nga suod gyud si Napoles sa mga opisyal sa Malakanyang mao ang iyang pagtahan didto mismo sa palasyo. Tinuod wala ni nagpasabot nga guilty si Aquino, apan nganong buot man niyang itago sa publiko ang kamatuoran nga managkaila sila ni Napoles?
* * *
- Latest
