Gugma sa radio

Radyo ang iyang unang gugma. Pagka magsisibya ang unang trabaho nga iyang gi-aplayan. Bisan napakyas ang pipila niya ka pagsuway, wa mapawong ang iyang damgo sa pagsibya. Gisudlan ang ubang trabaho nga nagamit ang iyang tingog. Apil nang pagka announcer sa higanteng kompaniya sa softdrink nga nilibot sa tibuok nasud alang sa ilang libreng mga sine.

Apan radyo gihapon ang gipitik sa iyang kasingkasing. Bisan nahimo nang malampuson nga negosyante, nilambo ug nananga na ang iyang Maribago Bluewater Beach Resort sa Kabisay-an ug Mindanao, radyo lang gihapon ang ganahan niyang balikan. Bisan napakyas ang pagsuway pagpalit og estasyon sa radyo sa Sugbo pila ka tuig ang nilabay.

* * *

Nagsugod ang iyang gugma tungod sa drama sa KZRC nga gipasiugdahan sa bantogang peryodista nga si Juan Mercado. Nabukhad ang batan-ong kabuot sa bag-ong kalibotan pagpintal sa gamhanan nga mga talan-awon ug mga sugilanon pinaagi lang sa tingog. Nadani siya sa pagmugna sa tunob sa asno nga gisakyan ni Hesukristo pagsud sa Jerusalem pinaagi sa pagpadapat sa bagol sa gagmay’ng bato ug sa dugdog pinaagi sa paghapak og kahoy sa sin.

Labing nakasuyop niya mao ang kahigayonan pag-angkon og lehitimong kinabuhi pinaagi lang sa paggamit sa tingog. Maong sa nisunod nga kapin sa unom ka dekada gitipigan ang iyang damgo nga mahilambigit sa radyo.

* * *

Nga natuman sa Dakbayan sa Butuan. Diin iyang gikakita, gihalaran sa iyang gugma ug gipakaslan ang inahan sa iyang mga anak, giumol ang ilang pamilya ug gisugdan ang ilang patigayon.

Sa Sugbo nahimugso ang iyang gugma sa radyo apan sa Butuan nakaangkon og bayhon sa niaging semana. Si Consul Arcadio “Dodong” Alegrado nipaila ngadto sa suod niyang mga higala sa iyang estasyon sa radyo nga nahimutang sa Almont Hotel, usa sa labing una niyang patigayon, sa kinapusoran sa Butuan. Gipiling Septiyembre 11, ang halandumong sumad sa ilang kaminyuon sa nitaliwan niyang asawa, sa inugurasyon sa DxAM FM, pahinungod sa ilang mga ngan ug apelyido--Arcadio ug Marley, Alegrado ug Montalban.

* * *

Nakaseguro ko nga ang lapad niyang kasinatian sa kinabuhi nakatudlo ni Consul Alegrado nga way kuwarta sa radyo. Nagduda gani ko nga sa tago nagpasalamat siya nga wa dayon makasud sa radyo ug nakahigayon pa pagsuway sa mas malambuon nga mga panginabuhi ug patigayon. Apan bisan kini wa kaiban sa iyang gugma.

Nipasabot si Consul Alegrado nga gitukod niya ang DxAM FM bisan sa kahinog na sa iyang pangedarong 79 uban ang paglaom nga padayunon ug palambuon sa iyang mga anak ug mga apo. Mas mahinungdanon kay sa estasyon sa radyo ug sa uban nilang patigayon mao ang gibilin niyang pagtulon-an alang sa iyang mga anak ug mga apo ug natong tanan: Ang pagdumili pagtahan sa atong damgo.

* * *

Email: [email protected]