Kabalaka sa linugdang sa kagubot

Gihamok  sa hilabihan nga kahadlok ang mga molupyo sa mga dapit nga sagad mahitabo ang kagubot sanglit  mahimutang man sa kakuyaw ang ilang kinabuhi ug dili na nila mahimo ang matag adlaw nilang gimbuhaton nga gitumong unta sa pagpalambo sa kahimtang sa ilang pagpuyo.

Kini maoy nasinati karon nga kahimtang sa mga molupyo sa dakbayan sa Zamboanga nga malinawon unta ang ilang pagpuyo apan kalit lang nasiak sa nagpungasi nga mga boto sa nagkadaiyang matang sa armas nga dili magpili kun  si kinsa ang maigo.

Matud pa nila nga ang maong kahimtang sa mga molupyo sa dakbayan sa Zamboanga nga gisulod sa armadong kalalakin-an nga sakop sa Moro National Liberation Front (MNLF) wala lamang makahatag og kahasaol sa matag pamilya sa  kasundalohan ug kapolisan nga nadistino sa maong lugar nga naglatay sa usa ka lugas lanot ilang kinabuhi kun dili lakip na usab sa tanang katawhan sa nasud.

Dugang pa nila kun  dili  madali sa paghatag og kasulbaran sa atong mga opisyal sa kagamhanan  kuyaw man hinuon nga mokaylap pa kini ngadto sa uban pa nga  mga dapit  dinhi sa nasud  nga Pilipinhon nga mosangko na unya  hinuon sa dakong kadaut sa kabtangan ug kinabuhi.

Giklaro nila nga ang mga molupyo sa nasud nga nahimutang sa halayo sa maong kaguliyang nga nahitabo sa dakbayan sa Zamboanga dili usab kalikayan nga mobati og kabalaka kay malakip man gihapon sa maapektohan sa linugdang sa maong kagubot.

Naglakip sa masinati nga epekto mao ang ekonomikanhong kahimtang kay  nagwiwi man kini sa nagkalisod nga kahimtang sanglit mosugot man kita ug sa dili sa gihapon makadugang  kini sa pag-usbaw sa presyo sa mga nag-unang palaliton sama sa bugas ug mga linatang sardinas.