Matapos na ang kalibutan?

Ang pag-ulan og ice nga nasinati sa lungsod sa Pinamungajan daw nakapahingangha kaayo sa pipila usab ka mga tawo sanglit  panghitabo man kini nga dili kasarangan nga gituohang mugna  sa kinaiyahan.

Sa pipila ka mga dapit dinhi sa nasud sama sa Mindanao sa miaging tuig daghan usab ang nahingangha dihang nasinati usab sa mga molupyo ang kalit lamang kaayo nga  pag-ulan og isda nga matud pa sa taho buhi pa kini dihang nangahulog sa yuta.

Ang mga katigulangan kaniadto sa nangaging panahon kun makasinati na gani og talagsaong panghitabo maoy motumaw gilayon sa ilang pagtuo nga tilimad-on na sa nagkaduol nga katapusan sa kalibutan.

Hinuon ang  Philippine Atmospheric Geophysical and  Astronomical Services Administration (Pagasa) sa ilang pamahayag maoy ilang gipasabot nga ang pag-ulan og ice sa Pinamungajan dili na bag-o sanglit nahitabo na man usab kini sa pipila ka mga dapit sa nasud.

Dugang pa nila nga dili kini angay nga katingad-an ang maong mga panghitabo nga namugna sa kinaiyahan tungod kay ang nakaingon niini mao man ang nasinati karon sa kalibutan nga    “climate change.”

 Ang hilabihan nga  kainit sa adlaw  sa higayon nga dili kini  matabonan og  bagang dag-om ug ang masinati nga  kusog nga ulan hilabihan usab  kadagko sa   lusok nga mohagsa sa yuta nga sulod lamang sa pipila ka gutlo makamugna gilayon og mga pagbaha.

Matud pa sa Pagasa gumikan gihapon kini sa climate change ug kini usab ang  hinungdan nga ang atong kagamhanan nagdasig karon sa katawhan sa pagtanom og kahoy alang sa pagpahiuli sa naupaw na nga kabukiran.