EDITORYAL - P10 bilyones pera na, naging bato pa

Kun tinuod kining  P10 bilyones kapin  nga  tua ra sa mga  bulsa  sa  taga NGO ug  sa mga  magbabalaod sa nasud, pastilan daghan  kaayong  makaluluoy  nga  Filipino nga  nagkagidlay lang ug wa nay  halos  makaon.

Pagkadako  sa maong  kantidad apan  nasud sa  puntil  nga  buslot  tungod  kay  wa maatiman  ang  pagbantay  niini   sa  mga  tawong  gipiyalan  sa  mga  mamumuhis.

Sige lang  ila pa ron,  sa sunod  ila  lang  gihapon,  kay  wa baya  kita  masayud  sa tinuoray  nga  pagkatawo  sa  mga  opisyal  nga  atong  pilion  sa  panahon  sa election.

Kun  ang  napili nato  pulos pa lang  buotan,  di tingale  malunod ang  atong  kuwarta  ngadto  sa mga  NGO nga  iya  sa engkanto.

Pastilan  kalisud  baya  sa Pilipinas  kun  ang  mapili  nga  mga  opisyal  sa  kagamhanan, mga  kawatan  kay  sigurado  gyud  nga  mahibus  ang  panudlanan  ug  ang  katawhan  maoy  makaluluoy.

Karong wa nay PDAF, mohilum ang  nasud, apan  inigkamingaw   motuyhakaw na usab  ang  mga  liog  sa  mga  nag-ung-ong  nga  kawatan  aron  mangita  og  paagi  nga  makagawas  ang  kuwarta  sa goberno  paingon  sa ilang  bulsa.

Naunsa  na  baya  ta  niini  nga  nadinagko  naman  gyud  hinuon  ang  kantidad  sa  salapi  nga  mawagtang  sa panudlanan  sa kagamhanan  gumikan  sa kawat. Busa  matapos  na lang  ang  kalibotan  di gyud  mawagtang  ang  mga  kawatan  tungod  sa  kalantip sa pangisip  ug  kahait  sa salabotan  sa  mga  Filipino  karong  panahona.