Nalipay ko nga ipatuman kining standardization sa mga licensed plates sa mga sakyanan nga irehistro sa Land Transportation Office (LTO) tungod sa kadaghan karong mga plaka nga wala na mosunod sa patakaran.
Si LTO regional director Raul Aguilos nagkanayon hinuon nga gi-hold pa ang pag-atiman sa programa pagbag-o sa licensed plates sa rason nga wala usab niya ipahibalo.
Apan kun ipatuman kini, mosuporta ko niini tungod sa akong na-obserbahan nga hilabihan ka daghan sa mga motorista nga mi-abuso sa pagbutang og licensed plates.
Akong naobserbahan kining mosunod nga sa akong tan-aw wala na mosunod sa standard:
1. Licensed plate number nga gi-imprinta lamang sa computer;
2. Licensed plate number nga pikas ug dili na maklaro ang suffix o prefix sa numero;
3. Licensed plate number nga ituwad og butang o magyuko sa ubos nga dili dali makit-an sa mga tawo engkaso og makadisgrasya ug mo-hit and run ang drayber;
4. Mga licensed plates nga hilabihan kahugaw, ilabi na sa mga trak de karga, mga 10-wheeler trucks ug mga utility vehicles nga gikargahan og mga hugaw’ng butang;
5. Mga licensed plates nga tabonan og plastic cover nga ang color brown o gray, nga dili na maklaro sa mga testigos engkaso og makasala sa karsada ug mo-hit and run ang drayber;
6. Mga licensed plates nga ginama lamang sa daplindaplin;
7. Mga licensed plates sa atubangan nga may marking PNP, NBI o uban pa, nga kun maka-violate sa balaod-trapiko, daling pasayloon sa mga enforcer;
8. Mga licensed plates sa mga government vehicles nga ginama lamang ug giimprinta sa computer;
9. Mga licensed plates nga hilis na ang kolor sa numero nga dili na maklaro bisan padul-an.
Mao lamang kini ang pipila sa akong na-obserbahan nga angayang korehian niining bag-ong licensed plates standardization program sa LTO.
* * *
Hayahay pa sa nangamatay si Janet Lim Napoles nga wala siya gitipon sa pagpriso sa city jail.
Kagahapon, gibalhin na si Napoles sa Fort Sto. Domingo sa Sta. Rosa, Laguna, gikan sa Makati City Jail.
Didto sa Makati City Jail gibutangan siya og air-conditioner, tratamento sa babayeng giakusahan sa labing menus 17 ka mga testigos nga miwariwari sa P10 bilyones gikan sa pork barrel sa mga magbabalaod sa atong “pork barrel republic.â€
Ang katabang ni Napoles nga iyang gipapriso kay iyang gipasanginlan nga nanghilabot og bra ug jacket napriso usab sa Makati City Jail, apan nag-antos sa kainit sa adlaw ug kabugnaw sa kagabhion uban sa sobra sa 100 ka mga piniriso, pero wala itipon kanila iyang amo nga si Janet kay gihatagan og VIP treatment.
Bisan unsaon sa pagpangulipas ni DILG Secretary Mar Roxas nga walay VIP treatment nga gihatag nila kang Napoles, sukwahi ang ilang gibuhat sa ilang estorya. Kun wala pay VIP treatment, nganong gibalhin man siya sa Fort Sto. Domingo? Ang Fort Sto. Domingo maoy gihimong prisohan sa mga high-profile detainees sama nilang kanhi Presidente Joseph Estrada, kanhi ARMM governor Nur Misuari, ug nilang senador Gringo Honasan ug Jinggoy Estrada.
Kining mga karaho mga opisyal sa gobyerno nga nakasohan, ug tungod sa ilang seguridad, gibutang sila ning pasilidad sulod sa Fort Sto. Domingo diin anha mag-training ang Special Action Force (SAF) sa Philippine National Police.
Kana kay P10 bilyones ang gipasangil nga giwariwari ni Napoles gikan sa kuwarta sa katawhang Pilipino, mao kini ang nakapasaka kaniya sa level sa mga kanhi presidente, ni Misuari, ug nilang Jinggoy ug Gringo. Giingon hinuon nila nga kuyaw og adunay mokutlo sa kinabuhi ni Napoles tungod sa nature sa iyang kaso diin nalambigit ang daghang mga politiko.
Apan dili gihapon ko kumbinsido nga kining mga butanga ang gamiton nga rason nga hatagan si Napoles og VIP treatment.
Kun si Juan dela Cruz makaligis og tawo prisohon sa baho ug bugnaw’ng prisohan samtang nagpadayon ang pagpaminaw sa kaso ug dili makapiyansa, walay kurtina, walay aircon ug walay nindot nga pagkaon sa prisohan, nganong VIP treatment man sa babayeng gipasanginlan nga nag-usik-usik sa kuwarta gikan sa atong buhis? Daghan usab karon ang nahadlok nga tungod sa pag-apil-apil sa Malacañang niining kasoha, mahanaw lamang ang mga ebidensiya daw bula nga gihuyop sa hamiling hangin.
Unang hitabo sa kasaysayan sa nasud nga ang presidente gi-surenderan og fugitive, nahitabo kini sa termino pa gyud ni Pres. Noynoy Aquino. Kun ang Hukbalahap kaniadto na-undang tungod sa paninguha ni anhing Ramon Magsaysay samtang siya pa ang defense secretary ni anhing Presidente Elpidio Quirino, ang labing gikalagutan nga personalidad sa nasud tungod sa pagkurakot sa pundo sa mga magbabalaod, didto misurender kang Noynoy Aquino.
Makita sa palibot ni Aquino kinsay ganahan kaayong dili mag-antos si Napoles sa prisohan.
Kini human nila gitaktak ang “taytayan†ni Napoles sa Malacañang nga si Brian Yamsuan, kinsa kanhi sakop sa kabinete ni kanhi Presidente Gloria Arroyo ug nahimong consultant ni Executive Secretary Paquito Ochoa.