Unta dili tinuod

Niay balitang maot nga mi-leak ug gidala pasapasa sa mga huhungihong. Matud pa, sa miaging piniliay kuno, adunay higanteng drug lord nga mi-offer og financial assistance alang sa campaign fund ngadto sa mikandidato pagka-mayor. Hapit matunga sa P1B (usa ka bilyon ka pesos) ang gitanyag. Makatental ang gidak-on!

Apan ang maong kandidato may kahadlok pa sa mga sugo sa Diyos, busa hugot nga mibalibad sa gitanyag sa yawa: “Ah, di lang ko anang drugs. Kay lifetime ang problema nga mahatag ana. Ang makasulod, dili na makagawas nga buhi.”

Sanglit wa man modawat ang unang kandidato nga gihagad, ang kaatbang na sab maoy giduol sa naasoy’ng drug lord. Ug same offer ang gitunol sa masamang damo.

Ang mga elector, kinsa ulahi nang nasayod ning maong tabitabi, nagmahay nganong kini pang tawhana ang ilang gibotaran. Mas maayo diay unta kadto ang pikas.

Nanghinaot na lang sila nga ang mikatap nga huhungihong dili tinuod. Kay kun matinuod, mosamot nga dili na gyud masulbad ang pagpalusot sa ginadiling drugas.

“Kun sa pagka-karon gitagoan pa kining nagkalainlaing matang sa illegal nga drugas, moabot ang adlaw nga iladlad na gyud kini sa mga aseras ug kadalanan. Harapharapan na!” Nila pa.

Mag-ampo ta nga unta dili matinuod ang ilang pangagpas. Ug usab ang mga huhungihong.