Pabaya

Lain na usab nga trahedya sa kadagatan ang nahitabo nga mikalas og mga kinabuhi. Sa akong pagsuwat ning maong lindog miabot na sa 39 ang patay ug 80 pa ang wala igkita nga gituohan sa kadaghanan nga patay na human magbangga ang duha ka mga barko kaniadtong gabii sa Biyernes sa miaging semana sa kadagatan sa dakbayan sa Talisay.

Ang barkong St. Thomas de Aquinas nga gipanag-iya sa 2Go Shipping Company usa ka oras na lamang unta sa iyang biyahi modunggo na sa pantalan sa dakbayan sa Sugbo dihang nagbangga ug ang cargo vessel nga Sulpicio Express Siete nga gipanag-iya sa Philippine Span Asia Carrier Corporation ang kanhi Sulpicio Lines Incorporated.

Ang nahitabong trahedya wala lang magbilin og dakong kadaut sa kinabuhi sa mga pasahero sa barko ug mga tripulante niini kun dili naghatag usab kini og dakong kadaot sa kinabuhi sa mga nagpuyo ug sa mga nanginabuhi sa dagat gumikan sa miagas nga lana gikan sa nalunod nga barko. Damay usab ang mga trabahante sa mga barko nga gipanag-iya sa duha ka mga Shipping Company nga gipanghiktan sa Maritime Industry Authority (MARINA) aron kini ipaubos sa pagsusi.

Tungod sa hitabo makapangutana kita kun nganong nagbangga man ang duha ka barko nga unta puwerte mang lapara sa dagat. Gawas nga lapad ang dagat, ang duha ka barko dili sama ka gamay sa "tongaw" nga halos dili nimo makita ang gidak-on niini. Ang duha ka mga barko, mga higanting sakyanan sa dagat nga bisan sa pila ka kilometrong gilay-on imo nang makita.

Gawas nga imo na kining makita bisan sa layo pa, ang duha ka mga barko sangkap usab kini sa mga kahimanan nga anaa sa advance nga teknolohiya. Maong ang akong nakita sa trahedya mao ang pagpabaya sa mga nagdumala sa duha ka mga barko. Negligence of the highest degree ang nahimo sa duha ka kapitan sa duha ka barkong nagbangga. Isip maoy in command sa barko natural lang nga sila ang han-okan sa tanan.

Ang nahitabong trahedya binohatan sa mga nagdanghag nga mga kapitan ug mga tripulante sa duha ka barko ug dili iya sa kinaiyahan nga ilang gipasanginlan nga maoy hinungdan. Klaro ug tataw nga tawo ang hinungdan sa trahedya ug dili ang kinaiyahan. Busa angay ug matarong lamang gayod nga sila taralon ug  silotan.