Ang tag-iya sa property mao ray adunay katungod nga maka-dispose o makabaligya niini. Apan ang maong katungod mamahimo niyang ihatag sa laing tawo pinaagi sa pag-execute og Special Power of Attorney kon SPA. Ang pangutana kun balido pa ba ang SPA kun patay na ang tawo nga mi-execute niini? Kana nga pangutana ang atong tubagon karon pinaagi sa atong column.
Dear Atty. Divine,
Maayong adlaw kanimo. Aduna lang unta koy ipangutana kanimo labot sa Special Power of Attorney kon SPA. Ang akong papa adunay yuta nga gusto niyang ibaligya sa dihang buhi pa siya. Tungod kay tiguwang na ang akong amahan, ako ang iyang gisugo sa pagpangita og buyer ug mi-execute siya og Special Power of Attorney nga naghatag kanako og authority sa pagbaligya sa maong property. Apan wa pa gani mahalin ang maong yuta namatay ang akong papa. Ang akong pangutana attorney kun mamahimo pa ba nako nga gamiton ang iyang Special Power of Attorney kon SPA kun ugaling aduna koy makita nga buyer sa maong yuta? Balido pa ba ang maong SPA? Unsa may maayo nako nga buhaton aron mabaligya ang maong yuta sa legal nga paagi? Salamat daan sa imong pagtubag sa akong pangutana. — Jesse
Dear Jesse,
Human namatay ang imong amahan nga maoy naghimo sa Special Power of Attorney paghatag kanimo og authority sa pagbaligya sa iyang yuta, dili na nimo magamit ang maong SPA. Kini tungod kay basi sa atong balaod sa Article 1919 sa New Civil Code, kini nagkanayon:
Agency is extinguished: (3) By the death, civil interdiction, insanity or insolvency of the principal or agent; xxx. Sa ato pa, tungod sa kamatayon sa imong papa ang SPA nga iyang gi-execute di na mo-epekto ug di na mamahimong gamiton. Hinuon kining maong provision sa balaod aduna say exemption kun pananglitan ang tawo nga gihatagan sa authority wa masayud nga namatay na ang mi execute sa SPA ubos sa Article 1931 sa Civil Code, laing exemption kun ang pagbaligya alang sa common interest sa principal ug sa agent. Apan aron way problemang motumaw sa imong pagbaligya sa property mas maayo nga kamong mga heirs o mga anak sa imong papa lakip na sa imong mama kun buhi pa mao na lang ang mobaligya niini pinaagi sa pag execute og Extrajudicial Partition with Sale nga pirmahan ninyong mga heirs ug pinaagi niini mamahimong legal ang pagdispose sa maong property. Hinaut nga akong natubag ang imong pangutana. Daghang Salamat and God Bless. — Atty. Divine
Alang sa inyong mga pangutana, ipadala lang ang inyong suwat sa Legal Corner sa Banat News, sa V. Gullas Street, Cebu City o email sa flores_divina@yahoo.com ug akong tubagon ang inyong pangutana pinaagi sa akong column matag adlaw’ng Miyerkules ug Domingo.