Si Pope Francis, kinsa nailhan sa iyang pagka maabiabihon sa tanang katawhan lakip na niadtong mga tawo nga mibiaybiay sa mga Katoliko, miawhag sa Kristiyanos ug Islam sa paghiusa ug pagsinabtanay alang sa kaayuhan sa kalibutan.
* * *
Ang lider sa mga Katoliko sa tibuok kalibutan mihimo sa iyang kinasingkasing nga pag-agda sa mga Katoliko ug Muslim nga hunongon na ang “unfair criticism†kon paglinibakay o pagsinawayay sa matag pundok.
Gihimo ni Pope Francis ang maong awhag sa dihang iyang gipahalipayan ang mga Muslim atol sa ilang kasaulogan sa Eid al-Fitr.
* * *
Gamay ra man ning atong tingug apan buot sab nato madunggan ang atong pagsangun sa awhag sa atong Santo Papa.
Angay kini pamation sa mga Katoliko ug Muslim kinsa sa dugay nang panahon wala magkahiusa ug gani nagpadayon ang pagsinawayay sa usa’g-usa bisan pa sa paninguha sa pipila ka mga pundok sa mga Katoliko ug Muslim nga magsinabtanay.
* * *
Labing maayo pa gyud unta kun giapil sa mahal tang Santo Papa sa iyang awhag nga hunongon na sa nagkadaiyang pundok sa Kristiyanos ang paglibak o pagpanaway sa isi’g nila ka Kristiyanos.
Nagkadaghan karon ang nanaway sa mga tradisyon sa dugay nang panahon gisunod sa mga Katoliko.
Usahay ang maong pagpanaway nahug na nga pagpanginsulto. Apan angay kita malipay nga kining pagpanginsulto wala ra man sad hatagi’g importansya sa Simbahang Katoliko.
* * *
TRIVIA. Maayong buntag sa atong mga higala diha sa Hipodromo ug Martires. Daghang salamat sa inyong nagpadayong suporta sa Banat News.