Sabotahe
Sagunson ang pagpamomba nga nahitabo didto sa Mindanao diin mikalas na og daghang kinabuhi ug ubay ubay sab ang naangol.
Ang pagpamomba gikabalak-an nga mokaylap pa sa ubang dapit sa nasud.
Kini maoy rason nganong ang kapolisan dinhi sa Central Visayas mideklarar og hightened alert.
Tumong niini mao ang pagsiguro nga di mokompiyansa ang kapolisan sa posibling pagsuyla sa kagubot dinhi sa kabisay-an.
Gani giangkon sa kapolisan nga dunay mga report nga 15 ka mga sakop sa Abu Sayyaf nga bag-ong migradwar sa training ang nagtinguha paghimo og test mission dinhi sa Sugbo, Dumaguete, ug Bacolod.
Samtang giangkon sa kapolisan ang maong report apan ilang giklaro nga wala pa nila kini masusi.
Duna hinuoy sukaranan ang pagpangandam sa kapolisan.
Kini tungod kay tataw nga ang responsable sa sunodsunod nga mga pagpamomba sa Mindankao disidido nga mohimo sa bisan unsang pamaagi aron mapaabot ang ilang mensahe ngadto sa gobyerno.
Dayag nga ang maong mga pagpamomba may kalambigitan sa nagpadayong sabutsabot sa kalinaw uban sa gobyerno ug sa Moro Islamic Liberation Front kon MILF.
Ang nagkaduol nga pagkahingpit sa katukoran sa Bangsamoro didto sa Mindanao hulip sa ARMM maoy hinungdan nga nagkaagrisibo ang mga supak niini.
Ang laing faction sa mga rebeldi nga muslim nagtinguha gyud nga lawgawon ang kasabutan sa kalinaw.
Usa ra ang buot nilang ipaabot sa gobyerno, dili mahimong ibaliwala sila ug biyaan sa sabutsabot.
Busa kun gusto ang gobyerno alang sa hingpit nga kalinaw sa Mindanao mas maayo nga unahon una niini pagsulbad ang faction sa MILF. Way kapuslanan ang pagpakigsabot sa MILF kun duna pay laing grupo nga dili maapil sa kasabutan.
* * *
- Latest
