Online predators

Kun anaa ang online pornography, anaa usab karong mga panahona ang mga online predators daw mga liyon nga nangita og mga tukbonon. Usa sila sa mga dakong risgo ug kadaut alang sa atong mga kabataan nga mahimong mailad diha sa mga nagsugwak nga mga online relationships karong mga panahona. Nahimong virtual ang maong relasyon. Sila ang mga online pedophiles nga nangita og mga biktima nga mga bata (lalaki man o babaye). Mahimong anaa sila sa mga nagkadaiyang mga chat rooms, instant messaging, discussion boards, emails ug tingali hasta na usab sa facebook.  Tumong ug tuyo nila mao ang pagpangita og mga potential nga mga biktima kang kansang kahuyangan ilang matataw. Subo palandungon matud sa survey nga 40 porsiyento lamang sa mga ginikanan ang nihimo og pagsusi mga ka-chat sa ilang mga anak diha sa internet. Kasagarang biktimahon sa online predator’s kadtong mga bata nga dunay problemang emosyonal, financial, sikolohikal. Mga bata nga way tinong padulngan. Mga bata nga naglibog ug wala matagad mismo sa ilang kaugalingong pamilya. Ang buhaton sa mga online predators mao nga sila mogasto sa ilang salapi, apnahon ug katakus aron ilang makuha ang simpatiya ug pagsalig sa kabataan nga ilang naibgan. Ilang pandayon ang pagsalig ning mga bataa ngadto kanila, ila ipakita sa kabataan nga sila kasaligan, adunay pagpakabana ug adunay pagtagad sa ilang panginahanglan. Ilang lamaton ang ilang mga biktima pinaagi sa mga gasa, atensiyon, kaayo ug kalooy.