EDITORYAL - Ang giingong Abu Sayyaf sa Sugbo

Kun tinuod  kining  maong  balita, di angay  mokompiyansa  ang  mga  Sugboanon  karong  panahona.

Mga  gaway  kini  sa Al Qaeda Network  nga  way  kukaluoy  nga  mipahagsa  sa twin  tower  sa New York  pinaagi  sa  pagmaniobra  sa  mga  eroplano  nga  gipadasmag  sa  maong  mga  tower.

Maayo  kaayo  mogama  og  binuang  kining  mga  tawhana  ug gani  bisan  ang  US  wa  mokompiyansa  niini.

Ang    mga  embahada  sa US  didto  sa Middle  East  gipatak-opan  tungod  sa kabalaka  nila  niining  mga  hulga  sa  terorista.

Kini tungod  sa  kagamhanan  sa  mga  bomba  niining  mga  tawhana  nga  mopatay  gyud  og  tawo.

Mas  maayo na lang  nga  may  nasimhutan  nga  balita  ang  intelligence  group  sa kapolisan  bahin  niini.

Karong  panahuna angay nga  labing  igmaton  sa  mga  kapolisan  ang  ilang  pagpaniid  sa palibot  aron  nga di  makalitan  ang tanan.

Ang  pahibawo  nga  himoon  nilang  testinganan  sa ilang  abilidad  ang  dakbayan  sa Sugbo,  di  gamay  nga  butang  alang  sa  maong  mga  terorista.

Busa  kun  naningkamot  sila  nga  makapatay  og  daghang  kinabuhi, anha  kini  sagad  sa  mga  lugar  nga  daghan  ang tawo   nga  mosuroy.

Apan  ang  kapolisan  atong  tuohan  nga  andam  na  sa  pag-atubang  ning  maong  hulga.

Di  sila   mosaler  dinhi  kun  way  mogiya  kanila.